全新CL500換樣之餘索性換埋心臟，今次移植到全新CL500的心臟，正正就是用在S-Class上，可以輸出388匹馬力、扭力高達54.0kgm的「強心」！0-100km僅需5.5秒，跳上車一刻已做足心理準備，不停叮囑自己：「面前係隻兇悍野獸，唔使急，慢慢嚟！」
起步不敢過於激進，輕輕一踩，車已靜靜地快速起跑，無想像中般狂野難馴。經過2分鐘摸熟後，放膽在石澳道快放，出力一踩，先是一下推背，耳邊傳來低沉又醒神的引擎聲，感覺與一般跑車不同，CL500快得來很舒服，沒有跑車般硬得嚇人的懸掛、避震，車廂靜得只聽到低沉的引擎聲，還有ActiveBodyControl（ABC）懸掛系統，高速入彎準，拖波入彎敏捷，比想像中易操控，但亦是這種無聲無息加速，令人好易被迷惑，無意中不停加速！好彩還有定速巡航系統配備Speedtronic車速限制裝置，否則一時快感隨時貴過油費！

今次再更近距離接觸呢部CL500，觀其外表，依然覺得它極似一架經過纖體、打扮時尚的S-Class，特別是車頭設計，帶點囂張的頭燈，與S-Class如出一轍，襯上Benz跑必有的三間式鬼面罩、大大個Logo，總覺得像是一個承襲了優良血統的混血兒。在它身上，可找到平治經典Coupe的流線、瀟灑外形，同時亦有最Top的S-Class的豪華、舒適性。
無可否認，在眾多同級高性能跑車中，它的舒適度必是榜首，因為CL500幾乎是把S-Class的豪華、先進元素盡收其中；高貴胡桃木內飾、真皮軚盤、真皮座椅、氣壓調節前座、Command資訊系統、高貴古典型時鐘、附設DVD機、PCMCIA卡插槽、MP3播放、8吋彩芒、KEYLESS-GO無匙系統、高度隔音設計、智能式自動恒溫空調控制系統等，百多萬車價已可享有二百多萬級豪房設備，計落都幾化算！

每次寫平治，例牌一定要提提其安全措施，因為平治的安全措施出晒名夠穩陣，尤其是新CL車系，所有型號（包括還未到港的CL600）都加入了Pro-Safe保護系統，整個系統包含Perform-Safe、Pre-Safe、PassiveSafe、Post-Safe等安全措施，當車內安全系統意識到可能有意外發生，座椅就會自動後移、拉緊安全帶，將危險性減到最低！而Pre-Safe更是最新科技煞車輔助系統，作用是透過安裝在前泵把上的掃描器，預先檢視前方的障礙物，當察覺到前方將會發生撞擊時，系統會以40%的煞車力度預先進行煞車動作，以減低撞擊程度。

338匹馬力果然有料到，最抵讚還是多個安全措施，對喜歡飆車人士來講最重要，大吉利是講句，有意外起嚟，保唔到架車都保到條命嘛！

雖說是4座位跑車，後座亦並非DogSeat，但空間感始終仍覺不足，女仔坐都還可以，但高頭大馬的男士可能會屈就少少。

引擎：5,461ccV8DOHC
馬力：388ps/6,000rpm
扭力：54.0kgm/2,800-4,800rpm
傳動：7前速自動波7G-Tronic
車價：$1,738,000
車輛提供：28957339（仁孚行）