自從車震事件後，男主角梁榮忠形象破產，連女朋友鍾麗淇都走埋佬，所謂本性難移，前晚忠仔同班舞台劇友去跑馬地正斗茶餐廳消夜，遇上靚女搭訕，顯得不知幾鬼開心，但劉雅麗送上門獻抱抱，佢就唔吼。
前晚陳潔靈同倫永亮喺演藝學院完成音樂劇《花Far世界》後，晚上10點幾約埋好友劉雅麗同劉玉翠等去跑馬地開餐，有份執導嘅忠仔到場後遇上一名路經現場，樣貌娟好嘅長髮女子撩傾偈，佢哋當街吹水，極度好傾，忠仔仲疑似同長髮女子交換電話㖭。

嘟嘟呂方寃氣

其後忠仔入食肆消夜，到凌晨12點離開，劉雅麗見有記者就明玩忠仔，大大聲同佢講：「整個擁抱先，一陣話你攬女呀！」跟住就擺出飛撲抱抱姿勢，嚇到忠仔閃都閃唔切，同之前撩長髮女傾偈嘅興奮樣判若兩人，劉雅麗寸佢：「咁渣㗎！你唔攬我，我叫Anthony（倫永亮）攬！」見劉雅麗同倫永亮大方抱抱，忠仔就更𤓓。
其實前晚有唔少圈中人睇《花》劇，包括鄭裕玲（嘟嘟）同呂方、林海峰同葉麗儀等，嘟嘟同呂方仲打情罵俏，嘟嘟話對演舞台劇「No啦」，係都搵呂方做，呂方就話要做就做演唱會，嘟嘟笑佢：「你做畀我睇呀？」一唱一和好鬼恩愛。林海峰就忙為棟篤騷度橋，連新聞人物「梁小姐」（梁洛施）嘅嘢都唔知，佢形容心情好似火炬手，遇到困難都希望順利傳到聖火喎。