鄧建明（Joey）、邵音音與雪梨等，今日喺觀塘以評選身份出席面包台頒獎禮記者會，頒獎禮將於下月2日舉行，到時會頒發音樂及電影共約50個獎項。

鄧建明指呢個全新頒獎禮，好有新鮮感：「佢連音樂上嘅細節位都睇埋，畀幕後嘅新人多啲鼓勵，因為依家聽歌用電腦，最多都係睇到作曲填詞，對音樂人少咗尊重同認識。」最近除咗忙住為鄭中基紅館騷擔任音樂總監，Joey早前仲同美國音樂人Mr. Pay Attention合作，希望有機會衝出亞洲。

同場嘅音音姐話香港已經有好多頒獎禮，但仲可以咁大膽搞一個新頒獎禮係好事：「呢個創意好好，同埋我睇到香港觀眾真係有參與，佢哋嘅關心、關懷好重要。最開心係拍咗嘅電影、音樂令觀眾開心，啟發到佢哋嘅生活，我辛苦咗10幾年，睇到咁好開心。」

精選娛聞，喺晒《娛果》
http://fb.com/appledailyent