一連20場劉德華「My Love Andy Lau 劉德華 World Tour」跨年演唱會今晚喺紅館開騷，由於今年係華仔舊年年初墮馬意外後首次再開演唱會，所以吸引咗唔少fans撲飛捧場，而華仔亦落力綵排，務求以最佳狀態演出。大會派發閃燈手環給觀眾，全場爆滿。而劉德華父母、鄭中基同太太、阿姐汪明荃、羅家英、黃日華、苗僑偉、薛家燕及甘比（陳凱韻）媽咪等都有去捧場。

2325 華仔其後唱《一起走過的日子》同《如果我有事》，唱完佢話：「好多謝過往日子，無論健康唔健康、開心唔開心都有你地支持，送畀你地每年演唱會都必須唱一次嘅歌《仍唱我的歌》。」未來仲有好長，只要你哋唔掉低我，我會同你地一齊。最後一首歌係唱出《真永遠》，dancer用手砌唔同圖案，華仔再向4面台飛吻，順利完成首場演唱會。於2324完騷。

2305 華仔換咗一身牛仔裝唱《今天》，然後就唱由《我恨我痴心》、《忘情水》、《再吻我吧》、《無間道》、《不需要愛情》、《愛不完》等歌組成嘅medley，唱完之後華仔同成班dancers瞓晒喺地，華仔問：「你哋攰唔攰呀？你哋要唔要唞唞呀？不如唞唞先啦。」之後華仔再問啲觀眾：「o依家幾點呀？以前我唔理，我有老闆吖嘛，o依家我係老闆嘛，唔理啦，再唱啦。」然後行咗去台邊唱《情深的一句》，台升起，華仔行到去台邊又坐低，雖然係近距離接觸，但睇到都戥佢牙煙。

2238 劉華除咗件褸唱《你是我的女人》同主題曲《My Love》，佢話：「今次好多人擔心我體能上可能辛苦啲，但我辛苦得好開心。」有fans大叫「重頭嚟過！」點知華仔話：「重頭嚟過？你係咪想我死呀？係咪傻㗎？」之後佢又冧fans，對住全場大叫「I love you」，可能重要嘅事情講3次，所以佢呢句都講咗3次，然後分別向住4面觀眾話佢哋係二奶、小三、貴人吖嘛，仲問大家有冇睇宮鬥片，之後唱《心只有你》。

2213 劉華換咗紅黑色燕尾服，由10個女dancer陪住出場，趙增熹帶領15人大樂隊加和音伴奏下，華仔大跳大唱《你是我的夢》同《男人哭吧不是罪》，又跳又唱冇難度，狀態大勇。

2205 華仔喺台上話想分享過往10幾個月嘅事：「我原本上年開演唱會，計劃得好好，諗住上年個女讀K3輕鬆啲，今年小一就煩啲，所以我擔心啲、好大壓力。今日我帶住好緊張嘅心情嚟到呢度，見到好輕鬆嘅觀眾，令我所有緊張同壓力，喺頭先完全解放。17歲開始有你哋陪伴，多謝你哋。」
跟住《17歲》，全場大合唱。最後佢仲向住panel位送飛吻畀fans，

2148 唱《愛你一萬年》時，華仔換上銀灰色西裝現身，囡囡劉向蕙亦換咗個甫士，坐喺媽咪朱麗倩大髀睇爹哋。之後華仔飲水、抹汗同除褸，啲觀眾尖叫聲震天，其後華仔仲將抹完汗嘅毛巾拋落去觀眾席，然後好鬼馬咁話：「我仲諗會唔會丟出去冇人理。」又扮除褲o氹fans，博得全場又咿嘩鬼叫。然後華仔話：「每年都有部分靜靜地唱歌，我平日去卡拉OK成日都聽啲男仔唱，有啲人又拍片話要聽呢首歌。」跟住佢坐咗喺張高櫈唱《暗裡著迷》，全場大合唱。

2133 華仔換過一身黑皮褸造型唱《假裝》，同10幾個性感造型嘅女dancer「舞鬥肉搏」，女dancer埋身摸華仔個胸，而囡囡全程「見證」爹哋被摸。

2123 之後華仔換粉紅色唐裝，企上只得一個人身位嘅吊台，升到上紅館頂同山頂朋友打招呼，邊唱《如果有一天》，個吊台環繞紅館轉，超近距離。華仔時而升高時而降低，如同喺觀眾頭頂飛過一樣。

2117 華仔唱完《笨小孩》後，好興奮喺台上繞咗一圈，跟住佢話：「我冇開騷8年喇，如果8年前生一個女都8歲喇！我要好好感受吓呢個感覺。」跟住佢坐喺個台度話「呢啲感覺我已經唔記得喇，你哋仲記得呀？」然後佢又用普通話問歌迷聽唔聽得明，又叫麻煩佢哋學廣東話，佢又話過去一年發生好多事，而佢收到大家嘅關心同祝福。

2051 華仔除去外套，露出白色背心，唱完《中國人》之後打大鼓，有歌迷大叫華仔好犀利、靚仔華。華仔老婆朱麗倩帶住6歲囡囡劉向蕙坐喺panel睇華仔打鼓。

2040 演唱會正式開始，身穿全白色中山裝嘅華仔喺台中央高台現身。

精選娛聞，喺晒《娛果》
http://fb.com/appledailyent