71歲威尼斯影后葉德嫻（Deanie），入行剛好半世紀，卻來到古稀之年才首度踏上舞台。今年12月她將演出舞台劇《親親麗南》，與好戲之人蘇玉華（阿蘇）、潘燦良及凌文龍首度合作。在劇中Deanie姐與阿蘇演一對母女，但這對母女關係非筆墨所能形容，既愛且恨，甚至會在台上上演暴力場面，連阿蘇也說︰「都非常多。」

早前葉德嫻和蘇玉華在灣仔接受訪問，對於今次獲蘇玉華、潘燦良力邀演舞台劇，Deanie姐直言︰「佢哋求其一個搵我都say yes，兩個直頭𦧲飯應。」在旁的阿蘇笑得開心。Deanie姐坦言過往有人找過她演舞台劇，但她認為不合適，她笑謂︰「劇本都係其次，都要問吓自己得唔得，會唔會中途死咗。」Deanie姐更自言是個老頑固，說得既認真又幽默，令在場的人都會心微笑。

論演戲，阿蘇是後輩，但演舞台劇，她卻是Deanie姐的前輩，問阿蘇可感壓力？此時Deanie姐搶先說︰「梗係唔係啦！我對住佢先大壓力。」阿蘇笑着說︰「Deanie姐好鍾意講笑，壓力呀！應該咁講，開頭傾時驚佢會推，但呢個角色全香港只得Deanie姐做到，唔會有第二個人選。」在旁的Deanie姐連聲說︰「Thank you！」阿蘇續說︰「無論演戲經驗、壓台感、年紀上都好配合，佢唔應承做，我哋唔會搞呢個戲。」

對於演舞台劇，Deanie姐形容今次如一場大考，她說︰「對我嚟講咁嘅年紀，有個咁嘅機會，你能唔能夠駕馭到呢？因為一年唔同一年，盡量做好今次，有冇下次就唔知。」至於演舞台劇有經驗的阿蘇，笑言不只要護聲，她說︰「演員同運動員冇分別，你要將身體訓練得好好，才能駕馭角色，到時要演27場，係一場耐力賽，所以要好好保護自己，唔可以鬆懈。」

今次要演一對另類母女，Deanie姐事前做足功課，她說︰「要落好多工夫，我搵番一本10年前睇過嘅書，書名好似叫《誰說家長一定是好人》，作者點睇為人父母，衰媽媽並非就係衰，只係大家用唔同嘅教育方法，可能咁而傷害到細路哥。今次劇中嗰媽媽，我覺得佢好衰好自私，乖女遇着衰媽。」

Deanie姐更想起了演音樂劇《歌聲魅影》的演員Michael Crawford曾說過，要視自己如軍人般，永遠準備好上戰場，Deanie姐說︰「我應該點樣去train自己呢？雖然我冇佢哋（指阿蘇）咁多嘢做，不過我都好尊重自己嘅身體，但我間中都會偷食朱古力同雪糕。」

聽到Deanie對自我要求嚴格，問阿蘇會否覺得對方挑剔難搞？阿蘇說︰「對於我嚟講，好合理，我哋係好應該去學習。好多人話自己係演員、演緊戲、做過舞台劇，都唔係嗰回事。香港嘅戲劇生態，太過求其，我哋要撥亂反正。」

多年來Deanie姐都保持體態，聲音又洪亮，她笑言︰「我有做gym㗎，以我70幾歲人係好活躍，如果唔係點會講嘢咁大聲。」Deanie姐坦言不會容許自己有太多的出錯，包括她的身體，她說︰「我每3個月驗一次血，睇吓自己有冇咩病，有病就快啲去醫，唔好死喺度。」Deanie姐更笑言吃澱粉質會令她想睡，故她會吃少一點，令自己更精神，還說：「我情願醜樣都要精神。」

撰文︰羅婉玲
攝影、攝錄︰葉君海
化妝︰Stephen Lau@Stephenmakeup（葉德嫻）、Vinci @ vinciwinki （蘇玉華）
髮型︰Seiko Sin@ Hair Culture（葉德嫻）、Green Cheung @AdmiX（蘇玉華）
場地：香港藝術中心

-----------------------------
【撐學生】
召集有心人 撐學生全年睇《蘋果》
立即按此
-----------------------------
《囚牢之疆》 專頁
揭開集中營邪惡面紗
今日新疆 明日香港