當年今日
關於我們

【7.21一年】受傷婆婆削骨換人工關節 留五吋長疤痕不能再跳舞

蘋果日報 2021/04/21 10:34

抗暴之戰抗暴一年

7.21元朗襲擊事件今日屆滿一周年,當日遇襲的人留下不可磨滅的傷口,後遺症更纏繞一生。65歲林婆婆在元朗西鐵站躲避白衣人追打時跌倒,導致關節發炎,右膝要削骨換上人工關節,留下五吋長疤痕。昔日她在體育館教授師奶跳舞,今日出入依靠輪椅,只能短暫步行。她對大批白衣人仍然逍遙法外感氣憤,「一年啦,佢告咗邊個呀?邊個入咗罪?咁大班人。」

在7.21事件前,林婆婆非常活躍好動,參加遊行可以走畢全程,閒時又會跳舞,「我不嬲都可以180度,腳踭(彎曲)去到屁股。」7.21當日,她日間參加民陣發起遊行後,晚上搭乘西鐵綫回家,列車在元朗站開門時,有年輕人跑入車廂求助,「佢衝入嚟,佢話下面打緊人。」她與部份乘客離開車廂去了解情況,結果在樓梯遭遇白衣人襲擊。

事發近一年,當晚情況仍歷歷在目,「一仆一碌咁跑囉,跟住你知啦,有啲人梗係快,有啲梗係慢。亂晒龍,好似人踩人咁推嚟推去。好得人驚,好恐怖。」混亂中林婆婆在樓梯間跌倒,事後醫生診斷她的右膝受傷發炎,去年11月21日安排做手術,切除受損的骨頭和軟骨,再安裝全膝人工關節。

手術後,林婆婆出入靠電動輪椅。她說,經過大半年的物理治療,右腿仍然腫脹,只能短暫行走,「你哋行十分鐘,我起碼行20分鐘。」她除下右膝的壓力繃帶,讓記者看手術留下五吋長的疤痕,「唉,好核突呀。咁囉,好核突呀。」
身體受傷不及心靈受創,在7.21事件後,林婆婆一度失魂落魄,「我直程兩、三個禮拜無瞓過覺,日日坐喺度喊,都唔係我嚟。以前阿媽鬧我係一個癲馬、傻大姐。我又唔食嘢,坐喺度係咁喊。」她最後向家庭醫生求診,證實患上創傷性後遺症(PTSD),要接受心理輔導和服藥。

這一年間林婆婆身心受折磨,瘦了十多磅。但她堅持追究事件責任,會見過港職代表、出席三次記者會。有媒體記者邀約她重返元朗站受訪,她亦咬牙答應,「其實嗰晚之後,我係一次都唔想去(元朗站)。」每次出席記者會前,林婆婆都會大哭一場,連醫生都問她,為甚麼還要出來。

她說,當然會恐懼,但憤怒情緒更甚,沒辦法說服自己沉默,「好似六四咁樣,你唔好講唔好提,一年一年、一月一月咁樣過,就係咁不了了之。我自己都60幾歲啦,我仲有冇機會再出嚟講呢?我自己都唔知。」她心中有氣,「就係簡單一句:我搭車返屋企,我做(錯)咗乜嘢?」
因為公開追討,身邊街坊、診所護士認得她。有人勸她不要太高調,她倔強稱:「我話打囉,你殺咗我都唔怕,都咁老。」有人悄悄告訴她,某街坊的丈夫在7.21有份打人,已經潛逃去潮州。對於大批白衣人逍遙法外,林婆婆感到無奈又氣憤,「一年啦,佢告咗邊個呀?邊個入咗罪?咁大班人。」

港府至今拒絕成立獨立調查委員會,而網上越來越多各種版本的7.21事件,包括黑衣人「先挑釁」、林卓廷帶隊「搞事」等等。林婆婆說,對黑白顛倒感到荒謬,「我覺得佢哋係好似用漂白水慢慢漂囉。」她覺得自己甚麼都做不到,只可以堅持複述當日發生的事,「好似你唔講、佢唔問、你唔提,係咪無發生過呀?」

-----------------------------
打國際線 《蘋果》英文版免費試睇 按此了解更多
英文版已登錄新版《蘋果》App按此下載/更新