之前憑《滅癌獻愛心報母恩弘大愛祝福大會》節目榮獲「2014電視節目欣賞指數調查」冠軍嘅亞視,噚日終於出到7月份糧,僅趕及係法定最後一日用現金支票出糧,八方真係為佢抹一把汗。
亞視執行董事葉家寶話,已經同新投資者簽訂咗補充協議,新投資者將會注資亞視,只要保證到以後有糧出,就會再請番人。佢仲話新投資者對亞視前景充滿信心,嚟緊嘅「三亞」概念大計,包括發展免費電視、衞星電視同網絡平台,會向通訊局重新申請免費電視牌照同新頻道,等一切手續搞掂再公佈。至於《滅癌獻愛心》點解會攞冠軍,做調查嘅民研計劃總監鍾庭耀噚日解畫,話欣賞指數同收視率無關喎。