50歲嘅《喜劇之王》周星馳做新一屆廣東省政協委員,任期五年。有人問,呢一步棋,會唔會係星爺最爛嘅喜劇?除咗星爺,湯鎮業同鳳凰台主持人馬鼎盛和吳小莉等都晉身政協之列。
此消息一出,好多人都會諗起爺嘅舊作——《國產零零漆》。
「等咗十年,我仲以為國家已經唔記得咗我。」
「點會呢?就算係一張廁紙,一條底褲,都會有佢本身嘅用處。」
更何況,星爺唔係一張廁紙,一條底褲。
今日唔少內地傳媒報道星爺入政協呢單嘢。有啲報道,越睇,越驚心。有內地傳媒引述廣東省政協某官員透露,星爺加入廣東政協,「應該是統戰部門做的工作。」吓?
其實就咁嘅,廣東省政協委員,都係由廣東省統戰部門協調有關界別,推薦產生嘅。唔使理會過程係點,因為無論點,透明度同公開度有幾高大家心照。
候選資格包括﹕
1.喺所在界別具有代表性
2.該界別同時又具有一定社會影響力
嘩,星爺都好忙喎,咁多生意咁多投資,秒秒幾億上落,點開會呀?廣東省政協方面表示,委員如果長期唔參加省政協組織嘅「活動」,將可能被除名或「請辭」(係咪應該加個「被」字?」)。
網民反應,唔講香港、講內地先,如下﹕
「拍過《九品芝麻官》、《審死官》、《算死草》等無厘頭喜劇,反映司法腐敗、執法腐敗、監督缺失,提倡良知、尊重民意、正義必勝的周星馳,會不會笑翻全場?在政協會議上又會有什麼樣的提案?」
「阿漆,國家終於有任務俾你啦!」