商台噚日繼續播出曾主席訪問細佬嘅錄音，曾德成講番提早退休件事，強調自己並非為做官而做官，佢係想為香港、為港人做番啲嘢，至於完成唔到任期，佢反而話有人係上台容易、下台難，佢就剛剛相反，屬於上台難、下台容易嗰種。
之後曾德成講到以前參觀過一間佛寺，入面有首布袋和尚講插秧嘅詩，大家都知插秧嘅人係倒後行，但首詩入面有一句「退步原來是向前」，而佢正正抱呢種想法，所以係真真正正樂意提早退休嘅。
雖然大家唔知德成嘅退步代表佢有咩向前，不過曾鈺成退下主席後選唔選特首就備受關注，至於佢細佬會唔會用其他方式為香港做嘢？曾德成笑住話做人要量力而為，仲話佢同曾鈺成已經係長者，呢個時代已經唔需要中國已故總理周恩來嗰種鞠躬盡瘁嘅精神，所以要適當放下。鈺成聽到亦不禁邊笑邊話，佢都要認真考慮呢番道理。