【智取大市】科技股的合理瘋狂（晉佳）
蘋果日報 2020/06/28 11:54
科技股晉佳智取大市Fastly
疫情令網絡技術需求增加，貨幣供應急增令貨幣價值相對技術嚴重貶值，致科技股越炒越高。
疫情改變世界嘅程度，事前的確冇人估到。達沃斯世界經濟論壇創辦人Klaus Schwab月初講過，疫情加速人才主義取代資本主義，着重資本多過人才已經過時。
調查研究機構Canalys 4月時報告提到，未顯著受到全球疫情影響嘅今年首季，全球Cloud基建服務投資額310億美金，按年升咗34.5%，按季升2.6%，但係第二季先至係cloud基建投資進入更高速增長嘅時間，而呢個行業本來就係科技行業其中一項最揼本投資之一。另外，以Apple、Amazon、Google同Microsoft計，加埋騰訊阿里，2019年資本支出總和都唔夠2,000億美金，今年疫情下估計會明顯增加budget。引用兩項數據，係顯示上述投資額即使爆升，仍佔數以萬億美金計嘅全球救市計劃不足一成，科技投資似乎用唔着太多錢，但疫情下能夠投資嘅科技項目供不應求，形成亂掟飛鏢嘅現象。
由於QE時代令資產價值捧到上天，求其喺香港沽棟甲級商廈去做私募科技投資，都買到手軟。而疫情令網絡技術需求增加之餘，貨幣供應快速增加令貨幣價值相對技術嚴重貶值，科技變得值錢咗好多。究竟係樓貴？定科技股貴？還是銀紙太賤價？
疫情第二波之下，市值未夠百億美金嘅內容傳遞網絡（CDN）供應商Fastly，追同業Cloudflare落後，可以兩星期升近倍，預測今年市銷率（Price to Sale Ratio）廿幾倍。雲端通訊平台霸主Twilio舊年市銷率26倍，股價喺跌市逆市破頂，其中原因係音頻概念嘅中國聲網Agora首日掛牌，市銷率可以賣到81倍。相反，銀紙供過於求令銀行業大大不利，仲要限派息回購為維持市場流動性買單。一面地獄，一面天堂，趨勢相信仲未完結。
晉佳
-----------------------------
-----------------------------
-----------------------------