馬會發牌小組養虎為患
阿Joe夏定安發牌小組
馬會CEO應家柏已委派賽事規管及發展執行總監夏定安,檢討近期連串爭議事件,睇吓點樣改進,當中包括點處理騎師突然改變馬匹跑法等馬迷關注議題。好多馬迷都希望馬會今次係認真檢討,唔好得個講字做吓樣算數。
其實除咗近期引起關注嘅相關問題,夏定安亦應該檢討埋現行嘅騎師發牌制度,牌照委員會早前公佈咗下季嘅騎師牌照,除咗麥偉利,原有騎師基本上全體安全過渡,審批完全冇考慮騎師季內嘅策騎紀錄同爭議表現。
好多外籍騎師嚟得耐,就自自然然變質,有唔少喺香港騎咗一段長時間嘅外籍騎師,俾馬迷嘅印象都唔多好,事實佢哋亦已經騎到滑晒。
好似請完假返嚟嘅柏寶,近幾季表現就倒退得好緊要,唔少佢騎開冇料到嘅嫡系馬,近排一換人就贏條街,難怪部份練馬師已經同柏寶減少交收。
今季曾犯天條拉馬嘅史卓豐,下季竟然可以騎足全季,到底發牌小組點解可以當冇件事?潘頓無疑贏得馬多,但係佢令人覺得古靈精怪嘅跑法亦多,下季發牌畀佢都應該加句關注佢表現啩?
反而好似麥偉利呢類新面孔,表現唔錯都冇牌,馬會俾人嘅感覺就係唔想變。馬會搵騎師嚟嚟去去淨係集中喺澳洲揀蟀,環顧其他地區,都有唔少名氣唔大,但非常騎得嘅巴西騎師,點解馬會唔試吓睇遠啲,向南美洲等地區嘅新騎師招手?