馬主Ｎ風塵僕僕，三十三日之內，飛咗二十幾日，由新西蘭到愛爾蘭，周圍睇馬，正是為人為己，為朋友買馬，為自己揀馬。去到愛爾蘭睇啱一匹有潛質跑打吡嘅好馬，立即替馬主Ｋ落槌，然後又飛返雪梨觀察自己隻兩歲馬，咁樣飛法，身體隨時會唔掂。
記得一位大名人二十年前某夜，喺福記與朋友食完大鮑翅大餐，返到屋企就倒地，好彩家人第一時間發覺，送佢入醫院，安然無事，一星期後立即去咗史丹福大學醫院做心臟搭橋手術。返到香港，見到左丁山個老闆，就傳達一個重要健康訊息，年過四十之人要注意（一）吸煙、（二）多飲咖啡、（三）食得好鹹、（四）逞英雄，飛去紐約開會之後，立即搭飛機返港。如果呢四件事有齊，爆血管就好似傷風咳咁容易。

大名人之言，左丁山銘記於心。呢日見到馬主Ｎ，就複述畀馬主Ｎ聽，叫佢唔好隔晚就喺飛機上瞓覺。馬主Ｎ苦笑話：「都唔想嘅，不過馬季歇暑愈來愈短，空閒時間有限。呢，我都驚患上機艙症候群。不過無意之間買到一款澳洲襪，可以促進小腿血液循環，特登買多一對送畀你試吓。」
原來馬主Ｎ睇過本欄講「賓架之襪」，到咗雪梨就去百貨公司買ComputerSocks，點知女售貨員話：「好少見到有人問呢隻牌子嘅喎，我介紹你一款Overlander長筒襪。」馬主Ｎ俾女售貨員冧掂，改買Overlander襪。返到酒店睇真啲，呢款襪嘅說明講得好清楚，適宜四十歲以上人士坐飛機超過四小時之用，襪管具有特備作用，防止小腿血液不流通。至於點解有此功能，馬主Ｎ與左丁山都唔係科學家，睇唔明，馬主Ｎ就相信澳洲製造商唔會亂點，以後搭親飛機就着呢款長筒襪，試吓係咪可以降低小腿嘅stress。