全球最矚目嘅世紀拳賽，由美國現任welterweight（次中量級）拳王美韋特（Floyd Mayweather）對曾奪得8個不同級別嘅世界拳王帕奎奧（Manny Pacquiao），噚日香港時間朝早9點喺美國拉斯維加斯舉行，好多人仲特登飛咗去當地嘅MGM Grand酒店現場睇，其中包括陳冠希（Edison）同賭王四房孻仔何猷君等。

據知，今次大賽啲飛一早賣晒，之前大會只將16,500張門票當中嘅1,000張作公開發售，售價由1,500美元（約11,700港元）至7,500美元（約58,500港元），聽聞Edison都要喺美國託晒朋友幫忙先至搶到飛，而且佢都撲唔到近擂台嘅貴飛，不過能夠親身入到場感受吓嗰個氣氛，始終比喺屋企睇精采好多。Edison可以入場捧美韋特，當然唔放過機會喺Instagram狂貼相同片，最後美韋特得到三位裁判一致判定以點數贏咗帕奎奧，有目擊者話佢睇得好肉緊同開心。

至於一向熱愛運動嘅猷君，都專程去捧美國拳王嘅場，雖然佢早排踢波受咗傷，但紮住都要睇，佢噚日話：「因為一直有睇boxing，咁大件事一定要去，好開心，全球16,000人去到呢個場合，將來一定要同子孫講，自己有睇呢啲世紀大戰，成個騷冇得彈，門票雖然好貴，多謝媽咪送兩張飛畀我睇。」
其他藝人冇法親身捧場都晨早起身睇電視直播，好似方力申、吳建豪同梁靖琪咁，佢哋都有晒出安坐家中睇呢場賽事嘅相，其中小方係支持帕奎奧嘅，佢話：「帕奎奧其實表現好好，只不過美韋特更好，雖敗猶榮啦！」
撰文：馮仁昭