近年冒起得好快嘅股評人、光大新鴻基財富管理策略師溫傑（Kenny，圖），幾個月前因為爆出桃色風波，收埋咗自己好一段日子，噚日Kenny終於復出，容光煥發咁分享下半年嘅投資展望。

稱5個月瘦40磅

冇見一排，Kenny身型弗咗唔少，驟眼睇足足瘦咗成個圈。Kenny話上年身體檢查肥佬，中晒「三高」，醫生話一係食藥、一係減磅，所以就決定做運動減磅，仲好自豪咁話自己用咗5個幾月時間瘦咗40磅，成個人健康返晒。咁究竟係咩運動咁有效呢？原來係靠打泰拳，前排仲特登去咗泰國操添。Kenny話自己有少少朝聖心態，放假去旅行順便練習一、兩堂，仲叫華華可以考慮吓打拳減肥。

Kenny幾個月前嘅桃色風波成為財金界熱話，華華問佢去泰國係咪趁機散心，佢就堅稱純粹為健康着想。再問佢處理好感情事未，佢就笑笑口，講咗幾次冇咩特別，現時會出返嚟繼續評下大市喎。

李華華
mailto:[email protected]