拍拖只有一年多嘅莊思明(Lisa)同楊明，被《蘋果》讀者發現佢哋去西貢相思灣睇樓，疑似係築愛巢同居( 新聞連結： http://bit.ly/2euC2yi )。今日莊思明孖家姐莊思敏一齊喺將軍出席活動，傳媒追問Lisa咪好事近時，佢就笑笑口話：「其實只係得閒去睇吓啫，如果遇到合適，都想一齊住，可以多啲時間見面。」

唔知Lisa嘅爹哋媽咪批准咗未呢？點知佢話：「佢哋唔知㗎，媽咪唔喺香港冇問過，爹哋又唔識中文，我只係覺得自己都大個女，o依家嘅感情可以加快到同居嘅地步，反正佢一個禮拜都有1、2日一齊，都係諗住多啲時間見面啫！」佢仲話：「反而有啲親戚朋友問我係咪結婚，如果真係結婚，點會唔講呀，呢啲嘢呃唔到人！」

雖然家姐莊思敏都唔知睇樓呢件事，不過佢就覺得如果真係修成正果，佢都好支持婚前同居，相信父母都會接受，莊思敏話：「楊明真係一個好男仔，佢對Lisa好好，我都叫妹妹唔會錯過呢個男仔，我都要努力搵男友，不過都o依家都遇唔到。」