閃電俠餘情未了 韋迪:想在熱火退休
NBA籃球熱火騎士邁阿密韋迪
日前啱啱以老將底薪230萬美金加盟騎士一個球季嘅韋迪(Dwyane Wade,前譯獲迪),禮拜四接受《美聯社》嘅獨家訪問,期間韋迪表明克里夫蘭唔會係自己希望退休嘅地方,因為佢嘅目標始終係返去邁阿密,再一次著起曾經著過13個球季嘅熱火波衫。
綽號「閃電俠」嘅韋迪話:「邁阿密嘅門永遠都唔會上鎖,有朝一日我希望自己可以著住熱火嘅波衫退休,我唔知呢件事點先可以發生,但我好希望當我決定退休嘅時候,係著住呢件波衫嘅。無論係重返熱火,抑或好似皮雅斯(Paul Pierce)咁短簽一日嘅合約都好,我只係想以自己加入聯盟嘅方式,作出終結。」
將來嘅事可能太遙遠,韋迪話選擇加盟騎士,係因為希望接受挑戰:「我唔想挑戰自己嘅話,就留咗喺公牛喇,但我希望喺最大嘅舞台打波,睇下自己仲有幾多斤兩。我相信自己仲有嘢可以幫到勒邦占士(LeBron James),佢已經係聯盟最好波嘅球員,所以我唔係幫佢變得更加勁,但我可以喺唔同嘅事情上面,令佢對事情有唔同嘅睇法。佢知道我會同佢一齊努力,喺身邊撐住佢。」