當年今日
關於我們

【收市閒情】《殼王的妙手仁心》三大劇情(千頌C)

蘋果日報 2017/11/28 21:22

收市閒情千頌C

江湖之事,一向跟紅頂白;一代梟雄,都有一沉百踩之時。
人稱「醫生」的殼股大玩家曹貴子,近期可以話係大大大鑊。起家之作康健(3886)畀證監DQ;原本身邊大把人跟出跟入跟刷鞋,依家個個劃清界線;多年帶挈啲左右護法搵食,依家護法們見師父落難,就周圍同人宣揚蓆已割。係嘅,人在江湖,出得嚟行,預咗要還;不過換另一角度睇,你會見到人情薄過紙,又多幾分唏噓嘅。
人性嘅體現以外,如果理清成件事個故事脈絡,其他呢個一套,個戲劇震撼效果,其實絕對可以拍到一部長劇,劇名叫《殼王的妙手仁心》。
劇情一:
股壇另一殼股高手「粉哥」同股壇長毛David Webb,因為一隻隆成(1225)交手。隆成大折讓供股,David Webb變相中伏,供股供死咗David Webb,聽講佢當年因為隆成輸咗8位數。去到今年Webb就出咗50隻不能買的港股名單,一次過爆晒隆成嘅關連公司,觸發「塵爆」事件!
講到呢度,你以為呢一場腥風血雨嘅戰爭,就算要傷,都係呢兩個男人之間嘅事。不過,事情往往峰迴路轉,當日細價股股災,涉事者當然唔執輸一齊沽,結果個價越質越低,累到行家們都俾人質死。情況就好似,有隻船就快沉,其中船主就掟同伴落海,點知一掟,水花衝擊力太大,搞到隔離架艇反埋!至於架船呢?船主繼續好食好住。
數返轉頭,今次醫生出事,一切源於David Webb輸嗰幾千萬。一代殼王GG,最後因為幾千萬呢啲濕碎數,仲要係人地嘅濕碎數出事,你話呢?邊個估到?
劇情二:
因為人地嘅濕碎數,搞到自己出事,以劇情來講,本來都好無奈。
但其實喺塵爆前,有人已準確逐步退隱,將部分啲殼一次過甩手畀另一個股壇猛人。咁就照江湖規矩,你搵啲人頭借孖展,我就過手畀你啦。
但都講咗,細價股股災出晒事,啲孖展倉畀人斬晒。依家錢就畀咗,但交收唔到,你話個猛人嬲唔嬲先?賣家真係內憂外患架。
係咁架,睇啲劇都係咁架,一代大佬諗住金盆洗手,同老婆返鄉下開餐廳,但呢個時候,總係有啲事情令佢走唔到不特止,仲要掀起另一場大戰。
劇情三
本來劇情去到呢度,人物關係已經好亂,點知呢個時候。蔡志明突然高調接受訪問,話醫生「呃佢」、「佢今次錯得太離譜」、「十世冇好死!」然後最精彩一幕係,事件竟然拉到去李嘉誠度,話曹醫生2005年同佢講,李嘉誠「等錢使」有意退股康健,所以佢就接貨。
「李嘉誠等錢使」呢句本來已經好震撼,就好似你同人講「陳冠希冇女溝」一樣咁莫名其妙。好啦,咁究竟當年李嘉誠沽貨後可以拎返幾多錢,睇返02年嘅紀錄,只係3900萬。以呢個講法來講,即係李嘉誠當年等3900萬開飯。
by千頌[email protected]堆填區
http://fb.com/winbigwok