近期中建系老闆麥紹棠又有搞作，今次同中信集團間接拉上關係。佢旗下中建資源（8163）宣佈，委任中信集團前董事長王軍做顧問委員會主席，專責向公司經營林木業務、棕櫚樹種植同棕櫚油生產提供意見。
王軍來頭有幾勁唔使華華詳細多講，佢老竇係已故中共元老王震，王軍掌管中信集團長達11年，直至06年先至退下火線。除咗王軍之外，麥紹棠同時委任徐錠明同李常蔚做顧問委員會副主席，佢兩位來頭亦唔細，徐錠明從事國家能源計劃多年，現任國務院參事兼國家能源專家諮詢委員會主任；至於李常蔚係軍工背景出身，曾經做過已故前國家副主席榮毅仁嘅特別助理，同中信集團都有啲淵源。