卅年前今日，香港演藝界齊心聲討中共血洗天安門屠城責任，罷工罷市上街靜坐聯署；卅年後，有人噤聲，有人借自己影響力宣揚愛國、但將子女親人送去外國；有人急急與六四撇清關係。

卅年前今日，身在北京的張堅庭，當年被好友文雋踢爆他「好驚共產黨」，但張堅庭每隔一段時間都會出來，講他見到的事。

昨日張堅庭在其YouTube頻道上載長逾21分鐘影片，回憶他在1989年6月4日北京見到的一切。他說當時正值寫《表姐，你好嘢！》劇本，北京學運正熾烈。大學修讀歷史的張堅庭悔恨未趕及見證「五四運動」，無法親睹最火紅、青春的年代；當時又聞北京天安門學生擬退場，張有感今次學運大抵已屆尾聲，故想親身見證這歷史性一刻，於是與製片及另一位好友一齊上京，再次回應當年為何拒帶「六四菲林」返港。

張堅庭指當年出發前，還問過當時在無綫新聞部任職的浸會舊同學，對方淡定謂：「完喇！仲上嚟做咩呀？」張堅庭稱：「但係都想上嚟睇吓呀！」又問對方應入住哪家酒店較好，對方推介了兩間，一間是王子酒店（今半島酒店），一家是北京飯店。不少傳媒，包括香港，都入住北京飯店。張堅庭一行三人亦選擇在此落腳。

「我6月2號去，周圍行，當時條街好旺，我影咗好多相，但唔知點解啲相唔見咗。瞓覺嗰陣，電話響，朋友打嚟：『聽講軍人入城喎！』即刻扎醒：『係咩？』行出騎樓，又唔係咁誇張喎，於是落去行吓，長安街，北京飯店隔籬就係長安街，而家嘅東方廣場。一路行嘅時候，氣氛有啲詭異，啲北京市民同軍人一堆堆咁坐咗喺度，大媽呀大娘呀大叔呀，我同佢哋傾偈，有一種緊張但係又悠閒嘅感覺，有人踩單車、有人乘涼。」

「有啲地方我哋去唔到，但因為我曾經喺香港電台做過partime，咁我就掛咗個證，同人傾偈。其實我係去感受吓啲氣氛。當時已經差唔多走。嗰晚都冇乜嘢。」

「6月3號嘅上晝，我哋又周圍行，都係一堆堆，有學生有軍人，喺廣場上，毛澤東紀念館、人民英雄紀念碑。我就喺度影。當時有好多外國記者，我好有印象其中一個，着住件卡其色、好大件嘅褸，托住部機，喺條梯，就喺長安街中間，又長頭髮，嘩，真係英姿颯颯，佢應該係法國攝影師，睇住有乜嘢就影。」

「我哋一路行，睇吓，食吓嘢，我係叫做……掹住歷史嘅車邊。」

「6月3日晚上，氣氛明顯不尋常。張堅庭憶述時，仍有點緊張：「當時我就……覺得……喺露台見到，有一種『今夜星光燦爛』嘅感覺，有啲燈射住，嗰種感覺係好詭異，有一種節日氣氛，下面有啲人喺度。」

「我都唔記得嗰陣幾多點，係咪七八點，我就落去行，當時已set up咗，警察多咗，但仍然有啲大媽，三三兩兩同軍人傾偈。我只記得行行吓，唔知邊度衝咗架小型裝甲車出嚟，沿長安街向天安門廣場飆過去，啲市民就用石頭掟佢。架車一行，我哋驚，唔知佢會唔會開槍。北京飯店有條長廊，裝甲車放咗兩個催淚彈，嘩，嗰陣我哋即刻飆入去，沿住長廊返酒店。」

「我跑得好快，砰砰嘭嘭返番入房。快到我兩個朋友都睇唔到，真係幾唔好意思……我話唔得喇，返番房喇。瞓咗陣，跟住電話響，『喂，軍隊入城喇！』香港啲朋友打俾我哋。」

「醒咗之後當然瞓唔到，就喺酒店行，又由騎樓裝出去，見到下面、啲車聲，去到深夜嘅時候，係咪深夜兩三點……開始混亂。我哋就喺間房裏面行來行去。我記得TVB記者、我老友，好多消息傳來傳去；有一間房好多香港記者喺度，我又唔係咁好意思，唔係記者，於是去第二間房睇吓有冇人。」

未完待續，詳見另文（新聞連結： https://bit.ly/2QMgY4T）

Part 1：「喂，軍隊入城！」張堅庭憶卅年前：裝甲車飆向天安門廣場
https://bit.ly/317V0hC

Part 2：記者訊息好混亂 張堅庭稱唔係講笑：死好多人
https://bit.ly/2QMgY4T

Part 3：張堅庭稱聽到掌聲 記者放下攝影機：是坦克！
https://bit.ly/2ERTt5F

Part 4：毋忘六四 張堅庭稱並非政治立場問題
https://bit.ly/2Kos3YR
--------------------------------
【六四30】守住歷史 拒絕遺忘
https://hk.adai.ly/zdzKtt2RiW
--------------------------------
【記住63836568】全民爆相爆片！下一個爆料王就係你
https://bit.ly/2Guolu9