【智取大市】港股並非不可守（晉佳）
蘋果日報 2020/03/01 18:10
晉佳阿里健康智取大市
美股上周五晚曾瀉逾千點，收市跌幅收窄，港股黑期則反彈400點。
港股上周五大成交大跌，係咪形成消耗性裂口？美股周五晚跌幅收窄，港股黑期反彈400點。
雖然話港股做第二隻腳，低位其實已低過第一隻腳，恒指跌到市賬率1.15倍，如果計埋末期業績後嘅年尾賬面值上升因素，市賬率再跌落1.1倍左右，去返18年10月低位水平，亦只係略高於16年2月，反映周期股殘到不堪。
樓市不跌，仍有個股亂炒，市場資金充裕，相信爆煲式股災機會不高。港股面對武漢肺炎、桑德斯上位、科技戰貿易戰、社會事件餘波等等嘅負面因素，已經反映喺幾乎差無可差嘅估值上。如果閣下揸住港股，年初至今冇乜損傷，證明持倉不太弱，有條件同實力喺大市低殘之下守落去。
舊年12月大陸實行嘅「新版藥品管理法」，有條件容許網售處方藥，點知一場武漢肺炎之下，阿里巴巴拿拿聲將其餘藥品銷售業務注入阿里健康（241）之餘，網售處方藥亦喺疫情下加速推進，容許阿里健康夥拍天貓向3億慢性病患者網上賣藥送藥，皆因長期病患者不適宜外出，網上買處方藥更合適。
還記得2018年6月，亞馬遜宣佈10億美金收購網上藥房Pillpack，市值單日升咗千幾億港紙，講緊美國網售處方藥物係一個更難畀外行人介入嘅行業，以亞馬遜規模大到咁，依然願意花咁多年精力去做，證明呢嚿肥豬肉幾咁大。如今阿里健康天時地利人和之下，面對大陸網售處方藥加快放寬，市值升至約1,800億，睇怕潛力仍相當強大。
晉佳