有謂樹大招風，騰訊（700）成日俾啲行家啄住已經唔係咩新聞，不過，近日俾內地公安「周」到，話佢夠「鹹濕」，就真係值得一提。
話說公安最近破獲廣東及湖南等地，有不法分子利用騰訊旗下QQ空間傳播淫褻色情訊息，公安話經過調查後，全國各地破獲同QQ空間內存有大量淫褻色情物品違法犯罪案件，夾埋有成70幾單，由破案情況睇，不法分子基本上都係放啲不雅照片同短片喺QQ空間，又或者利用QQ散播不良訊息。

網友放鹹相鹹片被搗

公安話，例如今年3月，佢哋就查到有件「東莞陳某」，放咗347張鹹相、19部鹹濕小說同埋19條鹹片喺自己嘅QQ空間，點擊率有3.95萬。唔知「東莞陳某」係咪受到我哋「香港陳某」當年壯舉啟發而咁做呢?
另外，公安又喺今年5月破獲一單通過QQ傳播淫褻物品牟利嘅案件，拉咗王某，佢利用QQ視頻進行色情表演，而觀眾只要向王某指定嘅QQ號畀Q幣就有得睇。
咁對於俾公安話係「境內大型網站中QQ空間存在淫褻訊息最突出」，騰訊有乜解釋呢？佢哋出咗份公告，大致話希望為用戶創造一個綠色、健康有活力嘅網絡空間，當然仲會自身嚴密監察，同埋同公安合作啦。係囉，快啲鏟走晒啲鹹嘢，唔好令Q哥哥同Q妹妹變成「鹽焗企鵝」嘛！

李華華
mailto:[email protected]