黃凱芹同「二胡王子」王憓，今日喺大會堂為今晚嘅「此時情音樂會FeelingsEnsembles」綵排，佢哋將會演繹黃霑、顧嘉煇嘅作品外，仲有四大天王嘅歌曲。

問佢會唔會唱自己啲歌？黃凱芹話：「本來唔唱，我唔想喧賓奪主，因為今次仲有二胡演奏，唔想好似鬥搶，但我都會唱幾首自己嘅歌。」

另外，問到王憓有關佢個國寶級二胡大師爸爸王國潼及歌唱家媽咪李遠榕，喺今年7月被騙徒分別冒充郵局職員、公安、檢察院人員，騙去合共2,000萬元嗰件案，佢話：「警方處理中。」捉到騙徒未？王憓答：「唔知，可能現階段未透露得。」再問佢知唔知父母被騙呃2,000萬元？佢話：「佢哋冇講，都係睇報紙知。」之後王憓又再一次「把握機會」，話下個月將會同關淑怡合作一場音樂會。