黎瑞恩（小恩子）、劉小慧同湯寶如呢三位昔日寶麗金小花噚日到港台接受鄧藹霖主持嘅《訴心事家庭》訪問，佢哋有成十幾年冇一齊喺電台做節目。以前係偶像歌手嘅佢哋，𠵱家全部都做咗媽媽，所以講起湊仔女經就雞啄唔斷。記得有段時間傳3小花面和心不和，小恩子話冇咁嘅事，只係有啲小誤會，但完全唔關工作事。
已有一子一女嘅小恩子，喺今年9月遇到件好唔開心嘅事，就係肚入面個BB小產冇咗，佢好平靜咁話：「當時係有啲唔開心，好多人sendmessage畀我，有啲都有小產遭遇嘅朋友打電話畀我講到喊，調番轉頭我要安慰番佢哋。我覺得所有經歷都係上天安排，順其自然啦！𠵱家身體好番好多，老爺同老公唔係好難過，仲安慰我叫我唔好傷心。」

小慧轟教育署

啱啱喺3個月前生咗個仔嘅湯寶如，就話未捨得結婚，要得閒先擺酒同結婚，之前其實冇計劃生BB，突然有咗咪接受現實。小慧就煩囡囡嘅功課，佢好激動咁話：「我一教佢做功課，EQ就好低，會好𤷪𤺧同迷失，我想炮轟教育署，小朋友功課深又迫佢哋學太多嘢，搞到張張刀冇張利，有時我都好內疚，為咗功課而打囡囡個頭。」