李澤楷旗下免費電視台「ViuTV」下年開台，其中請咗八個模界靚女參加MMA真人騷最為吸睛，但佢哋埋身肉搏之後，是非亦不絕，好似前HotCha成員黎美言（Winkie）就被指打得太狠，辣㷫對手「晶女郎」唐紫睿同歌手鄧穎芝。
據知比賽現已進入直路，參賽選手亦由八個淘汰剩四個，有份打入準決賽嘅Winkie，嚟緊仲有機會同死對頭鄧穎芝埋牙對戰。不過佢哋未落場比賽，最近就有傳Winkie呢排半夜成日接到匿名電話，搞到瞓唔到影響精神同埋比賽水準。

遲到要大懲罰

除咗俾對手杯葛，Winkie早排喺天台拍攝練習打拳鏡頭，遲到15分鐘，結果俾現場監製加咗個大懲罰，搵嚟跆拳道高手陳鈺芸當Winkie沙包咁狂揼，搞到Winkie要搵跌打酒捽心口。
噚日Winkie喺電話中就承認有收匿名電話：「呢排夜晚係收多咗啲匿名電話，但相信唔會影響到我focus呢個比賽。至於嗰次遲到，我係因為朝早M到，加上唔熟路，所以先遲咗。嗰日我捱咗JuJu（陳鈺芸）五腳，第一腳已經踢到肋骨，返到屋企都仲覺得痛。我有同工作人員反映，話自己得嗰次遲到，其他參賽都遲到次數一定比我多，但佢哋反而冇任何懲罰，不過諗番轉頭，可能工作人員咁做係想訓練我EQ啦！」
撰文：馮仁昭