王祖藍、郭晉安、岑麗香等今日喺葵芳為即將播出嘅《老表，畢業喇！》，佢哋玩扯大纜時，赤腳嘅「細細粒」陳嘉佳意外露底，祖藍即笑佢﹕「大家影唔影到佢條尿布呀？」十分抵死。

新劇以教育為題材，祖藍話未考慮將來小朋友嘅學業問題，佢有啲苦腦咁話好多人問佢幾時生、邊度生？祖藍就爆外母希望將來嘅BB去溫哥華讀書﹕「講到喺香港讀書充滿陷阱咁，話亞男都喺溫哥華讀書，我都有同安仔(郭晉安)嗰啲家長收風，但未決定，殺到埋嚟先算。」

李亞男早前以超性感低胸晚裝現身上海活動，笑言老公睇相後要休咗佢。祖藍就話﹕「呢個肯定係開玩笑啦，女生要趁年輕性感啲，我唔介意。」提到好友李晨成功向范冰冰求婚，佢話﹕「我今朝一早就恭喜咗佢，可以話係雙喜臨門。(知唔知幾時飲？)未，可能前一日先話我知。」

問到對新劇收視有冇信心？祖藍話冇留意數據，只望劇集俾人有「暖心」嘅感覺。而安仔已經係第三次同祖藍合作《老表》，佢話﹕「祖藍每次預測都好準，每次拍嘅題材都幾得意。（有冇建議祖藍去邊度生BB？）佢o依家想去全世界邊度生都得啦，到時就知喇！」另外，客串十集嘅岑麗香嘅劇中飾演校花，問到讀書時多唔多人追？佢笑笑口話﹕「我嗰陣比較怕醜，但都有少少，唔好講啦，都嫁咗人喇！」