【李八方online】李卓人工運想當年 26年前「背囡一戰」
陳凱欣李卓人馮檢基劉小麗伍廸希曾麗文李八方ONLINE
李卓人當年揹住得兩歲嘅囡囡上街爭取男性侍產假。李卓人fb圖片
政府提出萬億東大嶼人工島計劃,搞到唔少為人父母嘅市民,甚至大住肚都走出嚟,為下一代抗議。真係㗎,好多惡法劣政、權益,唔係上一代撐住、爭取,下一代就任人魚肉,好似以「為下一代,背水一戰」為口號,出戰11.25立法會九龍西補選嘅民主派代表李卓人咁,近日想當年,就諗返起自己26年前「背囡一戰」,揹住得兩歲嘅囡囡適之上街爭取男性侍產假,雖然政策喺3年前先至落實,「BB適之」都變「適之BB」嚕。
投入工運幾十年嘅李卓人噚日喺fb出po,憶述喺港大工程系畢業嘅自己,點解唔做專業人士走去搞工運、爭取基層權益,幾十年過去,最感慨梗係一切爭取都十分漫長,除咗男性侍產假叫足23年,爭取最低工資條路都行咗12年。阿人就話係「滴水終可穿石」,但一項權益爭取十幾廿年,人生到底有幾多個十年啊,唔會覺得「無力」㗎咩?但佢又好似真係冇,佢仲話下個目標劍指44小時標準工時喎。
今次李卓人為下一代背水一戰,唔知由細到大可算係喺爸爸抗爭路上一同成長嘅適之,會唔會出面幫爸爸拉票呢?人哥同八方講,依家喺英國傳媒機構從事記者嘅囡囡,十分支持佢繼續為香港人服務,因為囡囡都覺得香港前景暗淡,要有人撐住。人哥話,囡囡雖然唔會返嚟幫手拉票,但身體力行用支筆撐爸爸,幫手翻譯文宣,「我個參選文宣都係佢譯」,仲知道爸爸忙住競選工作,幫爸爸bookmark一堆Netflix電影,等人哥選舉完咗之後一次過追返夠本。
九龍西補選參選人還有馮檢基、陳凱欣、伍廸希、曾麗文。
立會補選新聞,《蘋果》一網睇晒
http://bit.ly/appledaily1125