韓片今年發熱發火，當中由孔劉、馬東錫主演嘅《屍殺列車》喺亞洲各地都賣到滿堂紅，喺香港仲收差不多近7千萬，即時打低一眾中港台電影成為香港史上歷年來亞洲電影No.1，認真犀利。

除咗《屍殺》外，喺韓國亦都有另一部災難片、由河正宇同裴斗娜主演嘅《隧道》推出，同樣成為話題。而下月7號就有金南佶、金明敏等主演嘅災難電影《潘朵拉》壓軸登場，《潘朵拉》由《屍殺》嘅製作公司Next Entertainment World (NEW)以120億韓圜（約7,920萬港元）打造，比《屍殺》嘅100億韓圜更加揼本。

《潘朵拉》講述日本311地震之後，地震引發核電事故，但當局就隱瞞事實，點知事件越嚟越嚴重，搞到金明敏飾演嘅總統就要發表講話，終於肯承認政府無能為力，國民要自己救自己，而金南佶飾演嘅應付危機技術人員就喺片中擔當拯救英雄。

呢部電影係韓國首部以核電站爆炸作題材嘅災難電影，片商早前已公開兩段預告，只見發生核爆後，全民逃難，估計到時片中又會有唔少反映人性善與惡嘅一面呈現喺螢光幕前。