【Little Englander】BNO卿姐可否唔好再倒米?(孫柏文)
孫柏文BNO
孫柏文尋日坐喺倫敦睇《泰晤士報》。一睇,好彩唔係飲緊水,如果唔係真係即噴水,因為睇到劉慧卿卿姐嘅讀者投稿(見圖)。
我今日想問卿姐,究竟您其實想唔想盡量救走啲香港人?想的話,可唔可以唔好再倒米?
點解我咁問?先講卿姐篇文,佢又講返近四十年個message。話英國政府唔自動畀香港人(唔知講緊97年前已係嗰啲,定係今日所有)居英權或真英籍,就係"treacherous"同"dishonourable"。
即係而家英國內政大臣Priti Patel宣佈,話如果「港版國安法」直接喺香港實施,就畀BNO香港人冇條件去住及工作權12個月,到12個月後可續期。住到5年就可攞英籍嘅政策唔夠。
我幾日前幫本報網站拍,講呢單嘢嘅短片,好希望卿姐同其他真心想為幾百萬個香港人爭取居英權嘅朋友,睇晒先好再講嘢。因為如果你哋學卿姐咁講,真會倒米,弄巧反拙。由原本差不多攞到,變冇。
喺個短片裡面,我分析過英國內閣最高4人點諗。首相Boris Johnson差啲病死,仲要病毒染咗自己大咗肚條女,對大陸有私仇,放生港人打中共ok。
外長Dominic Raab個老竇,當年1938年6歲喺捷克時,因係猶太人,被英國善心人以Kindertransport救走。唔係的話,老竇喺納粹統治下九死一生,根本唔會有佢,所以佢好明香港人處境。
財長Rishi Sunak同內政大臣Priti Patel,兩個都係印度裔。兩個嘅祖先都係由印度去非洲啲英國殖民地住。當年去殖時,佢哋兩個嘅祖先雖然揸住英國護照,都差啲去唔到英國,所以佢兩個最明您嘅point。
卿姐,您篇文嘅態度,好似英國政府話事嗰啲唔想咁做,鬧醒佢哋就得。我今日同您講,您錯晒。您其實明唔明佢哋係咩人?
大姊,您以前係民選議員,多屆票后,您冇理由唔知呢個民選系統點work。如果玩您呢招「殖民主義罪疚感」colonial guilt係能打動英國選民,令一個支持呢個政策嘅政府上台,我哋老早已經攞晒英籍或居英權啦。唔使等40年都冇。
我喺短片亦分析過,英國政治版圖,究竟港人攞英籍嘅反對力量來自邊度。工黨、自由民主黨已經支持港人,因為佢哋俾啲大愛左膠支持。不過最弊係如果大愛左膠係英國主流,保守黨唔會喺上次大選大勝,手執凸80席嘅國會majority大多數。
脫歐究竟點解您知唔知?您明唔明點解啲英國選民支持脫歐?喺英國人嘅眼中,佢哋當年70年代入歐,公投決定入一個自由貿易區。點知貿易區變吓變吓變咗做個「一歐一制」嘅政治實體。
啲人估計過,到2016年,每100條新嘅法律同政府條例當中,就有超過70條係由布魯塞爾直接頒佈。你作為英國人唔妥啲例,申請司法覆核,最高法庭唔係自己英國嘅法庭,而係歐洲最高法院。甚至自己國會通過嘅法律,呢個歐洲法院有權否決。
卿姐,您作為個當年日日做議員時對住啲建制派咁玩嘅人,冇理由唔明。由移民政策(冇得自己揀邊個嚟得),到越來越多政策範疇嘅決策權被移走去「中央」(布魯塞爾),相信您會體諒啲想脫歐嘅英國人。
仲有,呢啲想「當家作主」嘅英國人,對帝國歷史好清楚。不過無絲毫嘅「殖民主義罪疚感」,甚至覺得啲大愛左膠打呢張牌極度反感。我好簡單問您,冇英國佬?今日嘅香港會同湛江或汕頭會有咩分別?您個tone grateful少少得唔得?
英國人會問,呢一代嘅英國人,點解要還佢哋祖先嘅債?而佢哋祖先,已兩次為世界出過力,如果唔係,我哋個個都係講德文同日文啦。
好啦,唔用「殖民主義罪疚感」呢招,用邊招呢?卿姐,您作為多屆票后,您都識點拉啲偏建制游離選民嘅票,想佢所想。您多年來,都有帶嗰種「香港嗰套能振興中華」嘅message。可唔可以實制啲,忍吓自己鍾意點講就點講,有返啲message discipline,諗吓支持脫歐英國人想要啲乜?
我喺短片解釋過,對於佢哋來講,脫歐成功就係最重要。
仲要唔係脫咗就算。要脫後更美好先得。首先,佢哋想國民上下,都係一班珍惜主權嘅人。唔會下下輕易將主權移交他方。更加喺佢哋面對二戰後最大嘅經濟同政制改變嘅挑戰下,唔想攬啲負累上身,因為自己都好多嘢煩。
再講,香港人出咗名最大嘅惡習,亦都係英國人最憎嘅嗰樣嘢,就係「老奉」。您封讀者投稿去《泰晤士報》就正正係呢隻。
所以,奉勸所有真心想為港人爭取居英權嘅朋友,message得三個。
因香港人最明「英人治英」幾重要。我哋會令喺英國本土珍惜「主權」嘅人口比例增加。同埋絕對接受有關卡嘅入籍,以便香港人除去「老奉」嘅形象。
而家畀你來,不過要每年續期一次,住夠5年先俾你英籍,已係賣大包兼試埋有冇誠意。唔明點解要呢個message嘅人,掉轉諗吓點解我哋香港人都日日媽叉啲周末、假期返晒大陸嘅水泉澳邨單程證新移民。
最重要,入咗英籍,就唔該要認祖歸忠英國。要滅絕所有大中華味。唔好好似以前嗰啲宣誓入他籍嘅人,阿爺奶水一到,當宣誓食生菜。
同埋嗰啲已攞咗英籍嘅港人,唔好再講啲咩「脫咗歐後,冇得去歐洲住好唔方便」嘅低能嘢,唔該。
香港人嘅國際人脈網絡全球數一數二。英國人問起我哋識邊個,你只要同佢話當年特朗普差啲破產,都係幾個香港人救佢,兼最後帶挈佢搵咗一大筆。而呢啲case,多到數唔到。所以脫歐後英國,要建歐洲以外嘅網絡,我哋一定幫到手。
千祈千祈唔好話「我哋大把錢幫你經濟」嘅大陸土豪低能嘢,唔該。
三、香港人唔會game(老屈搵着數)個system
英國人,連啲左膠都驚當咁多香港人去時,會搞爆佢哋嘅福利系統。我多次在本欄講過,英國人視佢哋嘅醫療系統NHS為國家宗教。所以,住英國不過未有國籍嗰5年,就要次次有人問時,都話好樂意交「NHS surcharge」(醫療系統每年定額附加費)。甚至話:「NHS實在太好,thank you NHS。所以個surcharge應該收貴啲。」
點解咁樂意?要大大聲話:「TO PROTECT THE NHS!」
有咩唔講得?香港人嘅習慣係見嘢效率低就鬧,我見啲港人在英嘅網上群組最鍾意鬧NHS有啲咩做得唔好。我嘅建議係,唔該收吓口啦。喺英國鬧NHS辦事方法,就有如對住回教徒鬧真神。褻瀆呢家嘢,唔好再做,唔該。
嗰啲走精面嘅人,例如諗住入咗來,竄返出去等唔使真係住夠每年需要日子等。一見有呢啲港人屈機,就立刻舉報漏洞,要大義滅親,確保所有在英港人形象,唔會淪為中國人般。
最後,我聽到嘅消息係英政府內閣都覺得呢個計劃得民意係五五波。好多支持脫歐嘅英國傳媒工作者,都想凸顯任何嚟英國嘅人,欠缺嗰種教養去珍惜做英國人為何物。外來人都係「老奉」心態。刊登卿姐篇文?就係借卿姐把刀,去殺政策。
再一次勸告,卿姐,唔該明白及接受人哋係民主國家。政府要睇大多數民意,小數嗰啲已歸我哋邊。有少少message discipline得唔得?卿姐,重作,再投稿吧。
-----------------------------
打國際線 《蘋果》英文版免費試睇
按此了解更多 英文版已登錄新版《蘋果》App
按此下載/更新 -----------------------------
屬於香港人的移民攻略
立即登入
【全球樓行】 Dream House零距離