當年今日
關於我們

求驗客手記:入球王大衛希利 北愛救星 - 求驗客

蘋果日報 2007/11/19 00:00


有類人天生係紀錄王,北愛爾蘭射手大衛希利就係例子。呢位28歲富咸前鋒上周六2:1反勝丹麥場歐國外,射入嘅奠勝球係佢喺外圍賽第13球,破咗克羅地亞名將蘇加喺96年外圍賽嘅12球紀錄,仲保住球隊出線希望!
我求大俠反覆睇過入球片斷,佢喺大禁區頂背住一名後衞,見對方中場球員頂後於是用右腳攞但甩腳,好彩佢快對手一步追返並引球推向右邊,跟住轉身右腳一「唧」,皮球居然「笠」向遠柱入網。呢球波佢好可能係想傳入禁區,只係誤打誤撞射入。
「我唔想講紀錄」
不過,正如大衛希利賽後話:「我唔想講紀錄,我成晚都係諗住贏波。」有乜緊要得過贏波呀?只要北愛爾蘭下場作客爆冷贏西班牙,瑞典又意外輸畀拉脫維亞,北愛就可以首次進軍歐國盃決賽周。到時,大衛希利呢位北愛史上射手王(33球)仲唔入硬名人堂?
呢個大衛希利今屆歐國外鴻運當頭,06年9月對西班牙個人大演帽子戲法,07年3月對列支敦士登再入3球,成為球隊史上唯一兩度大演帽子戲法嘅球員。希望佢周三對西班牙再次發功,協助球隊奇迹出線啦!
出身曼聯青年軍嘅大衛希利,目前喺歐國外射入13球,領先次席克羅地亞嘅伊度亞度達施華(10球)同第3位波蘭嘅施莫拿歷克(9球),睇嚟佢好大機會成為歐國外入球王啦!此情此景,唔知曼聯領隊費格遜會唔會後悔當年冇留住佢呢?
empty