心悠於新片《女人永遠是對的》飾演事業成功OL一角，被傳整容而飽受委屈，影響工作機會，直至遇上由方力申飾演的踏實型男士，才突破心理關口，自在過活，她覺得某程度上演回自己，「我覺得係我囉，如果將我擺喺呢個situation，受到critic時我都未必show出嚟。」戲名非常女人主義，她亦堅信女權，「要時時相信自己係啱，先至有動力去push自己做到男人一樣。」

認識方力申多年，合作拍戲卻是首次，喜劇手法自然多笑料，「開工第一場已經係吻戲，仲要係我主動kiss佢，導演唔想我一開場就kiss佢個嘴，就由其他地方kiss，同導演研究kiss呢邊好，定kiss另一邊好，唔當佢係個人。」回想起來才覺得尷尬，「但當時諗住營造好浪漫嘅感覺出嚟，當時唔緊張。佢好專業，一埋位了解吓點樣行位就嚟，好自在舒服。」

目前心悠正在橫店拍攝大台古裝劇《深宮計》，之前已拍了三個月廠景。明知用三機製作，拍攝快、多產，搞到演員冇得瞓，時間調配上比內地劇緊湊，心悠亦敢於挑戰，原來是因為他！「記得以前成日睇到羅仲謙拍緊劇，好眼瞓，嗰時我就同自己講：『冇理由佢做到，我做唔到』，個個都話好辛苦，唔係自己去體驗，你唔會明白，當時我冇機會體驗就覺得自己一定得，做演員點都要試一次。」

心悠笑說每個人見到她都第一時間問是否很辛苦，「唔係用辛苦嚟形容，係好開心，好多得著，我覺得係值唔值得問題，我覺得非常值得，人生中難得可以chur三個幾月，瞓得好少。」值得的原因在於重金打造，服飾多方面夠細緻，是難得的誠意之作，酬勞當然亦很有誠意。

每次煞科後，心悠都會放假抖一抖，這次入劇組，日以繼夜拍攝多個月，每日只睡幾小時，主力靠中藥調理、飲蔬果汁補充維他命C來增強抵抗力，對長假訴求更強烈，「想調整自己身體狀況，長期咁chur，內臟失去應有balance，盡快調整正常瞓覺時間、食嘢方法，如果唔係會病。精神好，玩都開心啲。」