現年36歲嘅藝人金剛(本名：李信樵），自2002年投身台灣演藝圈，2007年決定來港發展加入大台，由於佢講啲唔鹹唔淡嘅廣東話都算得幾有個人特色，就算講「高廚」都可以不慎講成粗口，令全場爆笑，咁喺公仔箱做綜藝節目，觀眾自然好受落，尤其係拍《鐵甲無敵獎門人》時，周不時「講故仔」o氹大家笑，搞到佢就算拍《巾幗梟雄之義海豪情》，網民都惡搞咗唔少「金剛講故仔」嘅改圖。

不過，早前有消息指，金剛已經黯然離開大台，盛傳曾志偉曾同大台一位高層有爭執，令拍「獎門人系列」嘅金剛、王祖藍同錢嘉樂等，被大台「封殺」，由原本係綜藝節目主持「搶手貨」，變成甚少機會出鏡嘅藝人，而金剛亦同志偉佢哋分別北上發展。

當時金剛對離巢傳聞未有回應，但最近金剛不止於無綫幕前消失，就連大台官方網站，亦已不見金剛蹤影，連佢個blog都冇埋。

《蘋果》曾聯絡金剛，但一直未有回覆。不過咁，金剛上年尾錄大陸節目《勝利的遊戲》做主要嘉賓，呢個節目都係王祖藍工作室有份參與，若然真係離巢，王祖藍工作室都係一個好去處。

王祖藍今午以短訊回覆本報謂：「金剛本身母語係國語，所以佢都好想返台灣發展，同時亦都想睇吓有冇機會開拓內地市場，同佢傾完都好投契，咁所以就傾完一輪應該會過嚟，已幫佢接緊內地綜藝節目，希望佢有另一番發展啦。」

問到是否曾志偉拉攏？他稱：「咁大家都係跟獎門人，喺獎門人牽嘅紅線下，大家又係師兄弟，大家又投契，我知佢嘅工作態度又非常之專業，所以對佢好有信心。」

金剛有新開始當然戥佢開心，只係香港觀眾有損失——網民心目中嘅「TVB五大笑匠」：金剛、麥美恩、Bob、蝦頭同泰臣，o依家金剛無聲無息咁走，令人不勝唏噓，但更多陰謀論湧現——例如，關曾志偉事。

有網民留意到大台多年港姐總選係由志偉做鐵膽司儀，自2015年開始，志偉無啦啦坐歪做導師，翌年已經冇影，當時有傳佢同一位高層不和到出晒面。如今志偉班藝人朋友已逐一離開TVB，似想同某高層劃清界線，所以金剛離開，反而係好事都唔定。