【新增動新聞】
巴黎聖日耳門星期二喺歐聯大炒些路迪5:0，但隊中巴西球星尼馬賽後就唔肯同呢場比賽負責mark佢嘅18歲小將安東尼拉斯頓握手，尼馬因此飽受批評，有報道仲話尼馬亦都拒絕同拉斯頓交換波衫！點知原來尼馬應承咗將呢場波件波衫捐畀利物浦兼蘇格蘭名宿杜格利殊太太幫助乳癌病人嘅Marina Dalglish基金做善事，畀佢哋喺嚟緊嘅活動拍賣籌款，杜格利殊星期三仲喺Twitter公開多謝尼馬，而尼馬就回應話自己好樂意幫手。