陳炳銓、羅伊婷(Daisy)、趙詠瑤(Kimi)同黃奕晨今日到奧海城參與ViuTV《全港的》全民訓練日活動，以一身機師造型現身嘅陳炳銓笑指自己角色其實係司機，負責車住班靚女助手去到港、九、新界捉搵「的波高手」，佢笑稱自從做咗呢個節目，發覺同一眾靚女助手有代溝，因為佢哋實在太嘈，講到女友李佳芯係咪無咁嘈，佢指平時兩人工作都好攰，當然會靜吓。

再次登上雜誌封面被指女友包養，陳炳銓苦笑話:「係啦，大家真係好勤力，都無乜好回答，出街都唔會成日AA制，大家互相畀吓。(係咪你財政完全上繳交畀佢，所以佢負責畀錢？)有幾多，都係正常生活，簡單生活為主。」講到幾時私有化女友，佢指：「再搏殺工作先，雖然親朋戚友都不停問，都係隨遇而安，順其自然。」至於生B大計，佢直言係要好大責任，先做好自己先。

Daisy同Kimi本身都唔識踢波，不過都會睇足球比賽，Daisy指從以前睇靚仔為主，漸漸因為有朋友踢波而識欣賞球技，本身都偏愛運動型男仔。Kimi笑指接觸足球唯一係打機，再看看佢老公外型，好明顯佢鍾情青靚白淨多過運動男。

精選娛聞，喺晒《娛果》
http://fb.com/appledailyent