話入2百球踼埋歐國盃至收山
夏日球驗客:巴治奧精神可嘉

蘋果日報 2002/08/06 00:00


我求大俠好耐無提我老友巴治奧嘅消息,最近喜聞佢響熱身賽踢得好不特止,重聽見佢話想退休前射入二百球,兼代表意大利踢○四歐洲國家盃。睇佢奮鬥咁多年重唔放棄,值得拍掌支持,但亦奉勸佢老人家咪咁博,順其自然啦。
呢位三十五歲嘅老黃忠響意甲入咗一百八十一球,睇怕點叻都要踢多兩季至有望衝擊二百大關;至於國家隊,除非保守派掌門人查柏東尼落台啦,否則佢都幾難獲重召。相信球迷只想睇佢老人家放鬆啲踢多一兩季好波,唔想見佢太勉強。

囑戴維斯有路數好走
上個禮拜同干查講手嘅戴維斯,日前爆料話知祖雲達斯好想賣走佢,但佢講明除非佢自願走,否則會方都無佢符。查實今時今日已經唔會有太多球會吼佢,計我話如果有任何路數都要即刻走,反正被投閒置散咪重無癮!

熱刺想贏波要靠曲波?
中國國腳曲波喺熱刺試腳期間表現唔錯,上陣嘅兩場友賽都贏波,有機會繼續留效係件好事,不過國內傳媒報道就似乎誇咗啲。好似熱刺喺星期日友賽飛燕諾打和二比二,曲波冇上陣,佢哋就講成曲波冇出,熱刺贏唔到。嘩!飛燕諾係荷蘭勁旅兼歐洲足協盃盟主,而曲波上陣嗰兩場嘅對手不過係甲組仔,級數差好遠啫!
邊個話利記簽保耶?
講起國內傳媒,佢哋重有一單嘢令我求大俠𢱑晒頭,因為佢哋報道話利物浦再想簽番列斯中場保耶,重引述埋「紅軍」發言人同埋副領隊湯臣嘅說話,但妙就妙在英國傳媒至今都未有呢單料,究竟係國內傳媒咁神通廣大定抑或……我求大俠真係唔知。

盧迪克大把前途莫氣餒
美國網球新星盧迪克第一次打入大師賽決賽,大戰前夕梗係諗住瞓個好覺養精蓄銳啦,點知佢下榻個間酒店唔知搞乜鬼,半夜三更兩次響火警鐘,其中一次重要住客撤離酒店㖭,虛驚一場重令盧迪克冇覺好瞓,第二日喺決賽輸咗畀阿根廷對手簡拿斯都唔知關唔關事。不過照我求大俠認為,盧迪克係當紮之年,重有大把機會,嚟緊嘅美國公開賽佢肯定係焦點之一啦!