噚日32歲牛一，同隊友一齊食多次生日蛋糕，許埋願，就係時候執包袱……，AC米蘭不嬲有老人院之稱，不過當恩沙基、尼斯達等老兵續約，偏偏冇派路份，畀佢自由轉會。所謂此處不留人，自有留人處，呢間紅黑老人院唔收留，仲有間黑白老人院祖雲達斯收留，總算老有所終。
派路前日親口證實季尾約滿後會離開：「呢個係雙方同意嘅決定，我喺度嘅10年日子好難忘。」AC米蘭同我哋社署一樣，奉行「老有所屬」、「持續照顧」方針，啱啱就同37歲嘅恩沙基、35歲嘅尼斯達，仲有季中至加盟嘅34歲荷蘭兵雲邦美續多一年約。咁多人有份，但就冇派路份，話就話係雙方同意，但佢好明顯就係被棄用。

現實係殘酷嘅，派路喺今季受傷患困擾，加埋踢防中嘅佢要瞻前顧後，好需要體力勞動，首循環對帕爾馬射入奠勝，已經係佢全季唯一亮點，教練艾基利當然唔收貨。撇開人情味，AC米蘭中場真係要換血，所以搵佢開刀，相信佢唔會孤身上路，仲未傾妥嘅施多夫、岩布仙尼，可能都會步派路後塵，以自由身身份離開。
回望派路10年，由攻擊中場轉型到防中，到06年踢世界盃攞埋冠軍，係個人事業高峯。兩年前有傳佢會跟恩師安察洛堤過檔車路士，當日冇去，家陣廉頗老矣，仲有咩地方收留？有！祖雲達斯近年似足幾年前嘅AC米蘭，逆流而上走年老路線，吸納咗好多老將，有傳斑馬兵團已經同派路傾妥，會為佢提供3年合約，基本上係踢到收山囉。
派路如果真係加盟祖記，一定唔使怕冇人照應，因為家吓祖記現存或借嘅已經有6個06年世界盃國腳，包括迪比亞路、東尼、格羅素、保方、巴沙利、伊亞昆達，位位都年過30歲，加埋派路嘅話，講老，AC米蘭真係行埋一邊。