將軍澳維景灣畔賣得唔錯，不時都有買家買兩個單位，打通做巨無霸相連單位，但蘭西聽講，最近有買家，用三百二十萬買兩個一房單位嚟打通，面積只係得千一呎，只係比該樓盤最大面積單位多些少。呢個相連單位係十五座五百五十五呎嘅B室，同埋五百四十六呎嘅C室。
單位打通後，再將其中一個廚房改做房間，都係得三個房，點解買家唔買個三房單位呢？美聯物業營業董事李志成分析，可能係因為景觀嘅問題，重有一個原因，係相連單位客廳會變得好大，夠晒氣勢。
另外，李志成透露，十二座嘅E同F室，都有買家買嚟打通，面積即時變成一千四百幾呎，但價錢就要成四百八十萬。

中原指數有漏洞
中原地產同城市大學合作，用主要二手屋苑成交價，編製而成嘅中原城市領先指數，好能反映樓市走勢，所以不少證券行同銀行，都會參考指數走勢。但原來呢個指數都有死穴嘅，就係有時市場會出現一啲不合理嘅偏高或者偏低成交，特別係出現喺重磅藍籌屋苑，就會令到指數唔能夠真實反映市況。
出現唔合理嘅偏高價，其中一個原因係因為單位附連靚裝修，買家肯畀多啲；另一個就係買家認為單位風水好，唔介意畀多啲，以買得心頭好。呢啲因素係指數冇辦法計算嘅。
同一道理，市場偏低價成交，就係裝修殘單位，同埋凶宅。
當然，呢類偏高造價好少出現，所以對指數嘅長期走勢唔會構成影響。