內地昨日公佈，11月製造業採購經理指數（PMI）為55.2%，比10月上升了0.5個百分點，屬市場預期之內。數據公佈後，A股窄幅上落，連帶港股市況都較為沉悶，不過A股收市後不久，港股在歐洲股市帶領下升勢加速，大市終可以陽燭收市。本欄早前提及筆者趁期指跌至23000樓下，已經既投機又投資，博大市見底，自己會睇實近日低位22755，若然跌穿，投機的一注除了會平倉外，更會反手投機地買大市向下，但投資的部份則會逢低吸納。
士佳知道咁講會有人話我騎牆，不過實情並唔矛盾，舉個例子，若大市穿底，自己睇期指有機會跌到250日線附近，但股票唔一定跟跌，投機通常走短線，有明確目標，但投資則是增加股票持倉，目標會係揸到牛市尾聲，所以兩者睇嘅時間係完全唔同。投機沽空，只因認為大市續有調整，加買股票就因為長線看好，認為股票抵買，買完會唔會繼續跌，估唔到，不過投資就係搵價格低過價值的股票，既然長遠睇升，跌下來當然加注。

期指可挑戰24000

大家亦可看回4月至5月期指下跌多於3000點的時候，筆者並未提出過以上說法，因為當時個股比大市跌得更多，好多表現亮麗的股票都跌40%以上，反而期指只係跌約15%。而今次期指雖然跌了超過2000點，但好多個股卻不跟隨大市，還逆市創新高，與上次的情況實是兩碼子事，若近期吼實創新高股來買，如化妝股，應該有斬獲，而未創新高的，都應是時間問題。
近日壞消息充斥下，大市都冇再穿底，應有力一守。所謂有力一守，即是期指應可試23600至24000，到時走唔走就要睇心態，如果做衍生工具，可考慮先套利一半，而個股就望破頂，自己則會大膽點，博大市可以挑戰頂位。

張士佳
寶來證券（香港）董事　投資服務部
mailto:[email protected]