「遞完信出嚟，我又冇覺得好感動，反而有種抒懷。」請辭明志，說得相當有重量，不過任職有線3年的港聞記者阿Z（化名）平淡地道出當刻感受，全因辭職已是近年累積的念頭，「我諗對好多同事都係，噚日可以話只係一個導火線。」

原本休假的阿Z，於昨早約11時收到公司大裁員消息，中午馬上趕回公司，「返到嚟嘅氣氛係大家開始執嘢、影相，又會苦中作樂，大家笑下。」阿Z坦言，同事之間已有心理準備公司會裁員，但未有想過港聞同事會在名單之內，「過去幾次都可能炒吓後勤」。阿Z認為，令員工最介意的，是管理層應對員工的態度，「當你見到其他組係without any reasons（毫無原因）嘅時候，就會覺得好嬲」。

名單上各個優秀的名字，加上管理層未能提供充足解釋，同事之間亦開始醞釀不同行動，包括辭職明志。而令阿Z立下決心決定遞信的，是因眼見多位採訪主任都決定請辭，「你話係咪因為佢哋影響到我都遞信，某程度上係」，直至晚上步出公司大樓門口，感動之情才湧上心頭，「雖然喺有線都經歷過好多同事離離合合，但原來去到大是大非、重要關頭，大家都會坐埋同一條船，會一齊決定齊上齊落」。

有線員工昨日一整天，由驚訝、苦笑、眼淚走到離別。眾多揮手畫面之中，阿Z坦言，最難忘的是入房遞信一刻，除了是與同事的並肩作戰，還因為收信者正是新聞及公共事務副總經理許方輝。

當時阿Z與同事們排隊入房向許方輝遞信，但對方態度相當輕佻，「我哋行入去，話都想遞辭職信，逐個排隊畀佢，佢就笑笑口講咗句：『今次又有幾多張呀？』，係用『張』嚟形容，唔係幾多個人」。阿Z亦指，從其他同事得知，有採訪主任向許方輝遞辭職信時，亦有同樣狀況，「佢會話『得㗎喇，你做咗呢個動作就得』，即係當你做戲，你點都要做啲嘢去回應我哋炒人，咁當你做咗啦，做場大龍鳳，但其實唔係，大家都係好想離開。」

如何從愛走到心淡境況，要由最初說起。有線新聞部曾被冠以「有線快樂新聞部」之稱，齊集全行一絕，是優秀記者爭相加入的新聞殿堂，有公認最好的電視新聞。阿Z畢業後第一份工作，就加入《有線》做記者，「呢個地方嘅人係淨係諗住點樣做好一單新聞，就唔會有勾心鬥角，有空餘時間做無謂嘢，唔會耍辦公室政治。」

入行3年，令他感到有線發揮團結特質的，是去年的反修例運動，「你話係咪部署得好好，拍到好多靚片，『爆鑊』嘅地方影晒，唔係，但就係團隊精神，有啲位冇人睇，大家互補不足，即刻舉手埋位」，其他部組，如現時總辭的中國組、被裁的《新聞刺針》亦會落場參與，連休假的同事亦會自動獻身，務求拍攝到最多實況，「呢啲我覺得先係完全投入一個新聞工作嘅熱誠」。

不過，有線新聞部變天，或許數月前已稍有眉目。今年8月，有線新聞部管理層「大執位」後，即時解僱3名工程部資深員工。

「嗰陣已經有同上司傾過，其實一定會越嚟越差，嗰時已經有諗過辭職」。阿Z指，當初陳興昌、謝燕娜、李臻等人上場，其實影響不大，「我哋普遍都覺得，佢哋喺新聞認知上係冇乜專業嘅judgement（判斷）」。然而，當許方輝上任則有較大改變。阿Z指，有線與無綫報道新聞的風格一向不相同，前者較「貼地」，但後者用字較「保守」，惟許方輝卻要求將無綫一套帶入有線，連Facebook、DQ等英文都不可出現，「有啲同事怕麻煩，咪會自己避咗唔再用」，但變相令有線失去風格。

阿Z指，有同事曾做過有關「12送中港人」家屬的訪問，許方輝卻指當中內容「煽情」，要求加入當事人所涉嫌的罪行、為何要潛逃等的資料，「我哋得3分鐘cast，佢就係想感受性嘅嘢少啲，你就會知佢係想點，佢都唔想啲故仔出，因為佢會覺得你犯咗罪，潛逃就唔啱，仲喺度寫呢啲嘢。」

一批優秀的新聞工作者，為公義毅然離開新聞界。未來會否再做記者，阿Z指仍未確定，但坦言「記者難做」，亦有可能轉行，「由《國安法》，去到拉新聞記者，『阿爺』壓力又好大，視乎新聞機構個老細頂唔頂到，而家似乎頂唔到，咁入去做記者真係自討苦吃」。被問到對昔日戰友寄語，阿Z笑言「好愛大家」，「就算離開定留守，都係知大家好鍾意呢個地方，呢度差唔多係做新聞最後一個樂土，去到最後守護唔到，只可以講聲，大家都盡咗力喇。」

有人辭職明志，亦有人堅持留守。仍然留守的有線員工阿A（化名），入職只有3個多月，即面臨公司大地震。

阿A昨日如常上班，惟上班後傳來裁員消息，同事陸續收到電話，直至發現各部組都被蒙在鼓裏，公司氣氛由震驚轉為憤怒，「逐個逐個部門入面，專揀啲好穩陣、好骨幹嘅人去炒，到底係唔知咩人做得嘢，定係故意？」

阿A部門中亦有同事被裁，眼見不少同事辭職，阿A坦言亦有想過成為其中一份子，但認為自己屬新人，加上一人辭職帶來的力量很少，亦希望留守維持僅餘的新聞部運作。阿A的部組亦正在商討後續行動，假如同事打算集體辭職，自己必定會參與，但認為難以逆轉管理層裁員決定，「只係話畀香港人知，呢個新聞台就係咁樣無㗎喇，內部已經係腐爛咗。」

阿A形容，當初由紙媒轉到電視台，除了希望學習更多，亦因有線這個「金漆招牌」，「入面啲人亦無架子，對新人都打開懷抱，但要做嘢又可以好快整到條認真嘅稿」，現時的有線則變得毫無活力，「少咗交流，大家都有團烏雲咁。」被問到對同事們的寄語，「喺咁嘅氣候下，只要做好本身、對得住自己，已經值得加獎。」

另有有線員工指，自昨日架構重組後，昨日曾與員工對質的4位高層，包括稱員工為「爛仔講數」的新聞總監陳興昌、李臻等，均未有再與員工會面，「繼續匿喺各自間房度無出過嚟」，未有再向員工解釋人事變動原因。

據了解，今日最少再多兩名新聞部員工收解僱信，分別是資料室主管和一名剪接師。《有線》回覆指，今天部份員工仍收到離職通知，只因昨日有部份受影響的員工正在休假，故待他們今天上班才安排處理離職事宜，因此並沒有另一批被裁的名單。

記者 盧珮瑤

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！