雷神莫雷拉近期冇晒氣勢可言，今晚（5日）快活谷夜賽佢有七駒列陣，其中第六場三班1650米之「怡德」上仗由雷神跑第二，今仗再由佢操刀，其實有段古。

有時雷神同普羅大眾一樣，冇心水寧願唔參與，如今晚第五場唔係冇人搵佢，但據知雷神冇隻鍾意，寧可坐冷板休息，都唔勉強落場，變成冇座騎。

原來第六場情況亦一樣，雷神亦冇邊隻鍾意，都諗住休息，直到「怡德」於延遲截止報名階段才臨時加入，雷神才二話不說就應承「怡德」廐主霍利時。

歷來「怡德」、雷神人馬合作6戰1冠3亞1季1殿，細馬上次在四班負重磅難跑，來遲一步輸頸位屈居亞軍，呢次上三班負輕磅，難怪雷神肯騎。