當年今日
關於我們

【收市閒情】再熱血的初創 也有變質時(千頌C)

蘋果日報 2018/08/21 21:17

千頌C變質初創收市閒情林偉駿阿信屋

正所謂「你變啦,你以前唔係咁架!」人本來就係一種多變嘅生物,一個人待人處事理念底線,遇上某啲人生關口、轉捩點、或者係刺激,本來一直堅信嘅原則,都可以瞬間瓦解;情況就似好多男男女女,為自己嘅風流史開脫時,最常見原因都係,「我變成咁,係因以前俾人狠狠地欺騙感情,所以受刺激」。無嘅,堅持堅持,值幾多茶匙啫?
好多時一間公司,或者Startup成功跑出,背後都係一個又一個熱血嘅故事!故事通常都係創辦人,搵來一班有心兼對佢有信心嘅同事,日日圍埋度橋仲諗Execute,結果成功搵到第一單生意、第一宗投資、第一桶金,然後公司變大…越來越大,然後你以為一眾開國功臣可以論功行賞,分封諸侯?世事有咁輕易,紅隧就唔會日日塞車了。
事實係,唔少Startup一成功擴充,「Well…我哋依家係international公司,當然要啲international嘅talentssssss,係時候出去搵啲經驗老到,人生有經歷嘅高層坐陣!最緊要係咩?梗係出去Pitch investor時,個Mangement team睇落好勁!」要睇落好勁,咪去啲大公司高薪挖角,然後悄然空降,話晒你重金禮聘佢哋返來,當然要俾佢哋獨攬大權話晒事。
結果係點呀?結果事情變質了!原本幫佢哋開山劈石、最了解公司運作嘅開朝元老,上面無啦啦空降多個「外援老細」。遇著個叻嘅,都仲可以相安無事;遇著嘅忌材嘅呢,咁就GG了:當元老想搞campaign?外援會話「NO!你嘥錢!」當個campaign有數返,外援就會同人講「都一早話咗要聽我咁做啦」。總之,元老想做嘢?唔俾!因地頭蟲上位,猛虎(佢自己覺得係)就會冇碇企;有功?就梗係認咗先!
Startup可以成功,橋唔係最緊要,有好嘅團隊先係動力!不過,當一間公司發圍,外表有品牌有光環,但內心團火已熄;有心做嘢嘅做唔到嘢,有心玩嘢嘅大權在握,唔做實事,只搞辦公室政治。沒有最初嘅熱血,光環仲可以維持幾耐?
「咁公司大咗,自然要變得冇咁熱血啦。」呢句說話,同啲人話,自己曾經被騙所以變得風流一樣,都係大話。
後記:
講到變,阿信屋老闆林偉駿最叻就係變。由做線圈生意,變做零食店;行家玩封殺,變陣日本直送;抱住「做生意邊有界?」變奏變出雲吞麵店、藥妝店、便利店…。業務再變,但林偉駿敢於求變嘅本質,從來沒有變。作為一個廠佬,要轉型時沒有包袱;作為一個上市公司老闆,對住記者們,說話坦蕩真心從無變質。
林偉駿先生,多謝您那幾年來一直的幫助;更多謝您為香港零售界,寫下一頁歷史。願安息。
by千頌[email protected]堆填區
http://fb.com/winbigwok