向來被《文匯報》稱為「港獨分子」嘅新民主同盟荃灣區議員譚凱邦（Roy），噚日榮登呢份黨報喉舌嘅頭版，但竟然一句都冇鬧佢，唔通阿Roy投奔咗敵陣？

「第一次唔使俾文匯鬧」

睇真啲，點解呢張阿Roy解說青嶼幹線問題嘅相片圖說係「運輸署講解收費站安排」，似乎左報認錯人大甩轆，誤將阿Roy錯認為運輸署職員？佢自己都喺facebook貼上《文匯報》頭版，自嘲成功登上頭版，重點喺hashtag，「第一次唔使俾文匯鬧」。
八方問過阿Roy，提起此事都笑爆嘴，話證明該報是是但但，「個幾月前仲鬧我散播港獨，兩三星期前仲話我反高鐵係為反而反，今日就將我變成運輸署職員！」
阿Roy仲話訝，其實噚日現身講解青嶼幹線收費問題時，一開首已介紹自己嘅區議員身份，大部份時間都係鬧運輸署，笑說：「可能《文匯報》記者覺得我鬧得好有道理，解釋得頭頭是道，所以以為我係運輸署員工啦」，佢話對此報道當然一笑置之。