當年今日
關於我們
出「人情牌」打動沙維奧拿
求驗客手記:笠臣搵「巴迪高」做說客
蘋果日報 2005/06/20 08:00
自從白賴仁笠臣執教鞭以來,招兵買馬時梗有啲出位搞作,好似近日有傳佢想打阿根廷前鋒沙維奧拿主意。聽完你肯定會覺得佢大想頭,實情係原來白賴仁笠臣手上有張王牌,就係巴迪斯圖達。
沙維奧拿近年事業發展麻麻,但始終係國腳級星將,要離開所屬球會巴塞隆拿嘅話都一定會有唔少球會爭,幾時輪到幾乎連英超參賽權都保唔住嘅西布朗?原來白賴仁笠臣好把炮,極可能搵到「巴迪高」加入教練團……,咁大家明啦,巴迪斯圖達係好多阿根廷年輕球員,包括沙維奧拿嘅偶像;只要搵「巴迪高」做說客,話唔定沙維奧拿真係會俾呢張「人情牌」打動。
不過阿根廷球員喺英超成功嘅例子其實真係有數得計,笠臣以前教米杜士堡搵啲星返嚟都多數名大於實,希望佢真係計好沙維奧拿啱隊波用;否則只係為噱頭,就算真係爭到沙維奧拿都未必係好事。