歐陽震華(Bobby)之前因為急性肺炎而被送入院救治,拍劇工作要暫停,今日佢首日開復工,精神抖擻嘅Bobby獲拍檔關詠荷(娥姐)等人送上果籃、心意卡、雞精及膠喉一條。
娥姐笑言:「我係代表老婆同fans送條喉畀你,警戒你唔好再亂放嘢入口。」Bobby嚇到儍笑話:「呢條係尿喉,其實係膠喉,依家見到喉都驚。」即隨掟開條喉。佢又話一早已想開工:「你哋見我周圍走,都係食吓齋,食吓飯,依家節目提早6個鐘,夜晚11點前返屋企,真係健康咗,我對眼冇以前咁黃同有紅筋。」
無綫更加體恤Bobby,開廠景就冇外景,有外景就唔用廠景,Bobby話:「以前拍劇,以一個人嘅體力係超負荷,經過咁多年洗禮,我以為自己好強壯,可以瞓2、3個鐘,雖然呢套劇有8個鐘畀我瞓,但計埋車程、睇劇本,實際只得4、5個鐘,依家我日日都安樂醒,所以keep到個肚腩,係塊面瘦咗少少。」