每年都有新的父系出現，經過一段時間引證，失敗的父系會自然地被市場淘汰，而成功的父系則會繼續開枝散葉。BattlePaint是其中一個新晉父系，牠雖只贏過三場普通的短途賽事，而最佳成就只是在一級賽獲亞軍，但自2010年開始配種，至今已有四匹子嗣在港上陣，其中「相中有你」及「連利進寶」已贏馬，前駒更加贏完草地再贏泥地，證明這個父系適合香港賽事模式，雖然並非名牌父系，但亦值得留意。
報跑周日第三班1200米的「連利進寶」，母系出自CapeCross，計血統應該宜跑中距離。前仗在港初出跑1200米，後上只輸頸位跑第二，當日鞍上人發揮有點輕率，以致姍姍來遲。翌仗騎法較進取，前段已經守好位，直路發力即彈開個幾馬位，贏馬姿態輕鬆，質素至少三班夠贏。今次升班而只孭119磅，同場對手未有一匹在季內曾在三班贏馬，賽事水準唔高，增加連捷的機會。近期蘇保羅馬房的質新馬表現好，早前憑「光芒再現」及「醒蹄飛」起孖，剛戰又贏「活力之駒」及「錶之勝」，馬房攻勢一浪按一浪。「連利進寶」上場因不良於行退出，翌日已恢復操練，證明健康冇大礙，四歲PPG當起，再贏一場不足為奇。