曾演出《西遊．降魔篇》嘅內地已婚紅小生文章，圖文並茂被拍到背妻馬伊琍偷食姚笛，兩人到香港及深圳風流快活。今日凌晨時份，文章趕及於偷拍相正式被公開之餘，於微博拆彈並認錯，十小時內包埋轉發評論同俾like人次已破260萬大關。

就在文章爆出婚外情之際，忽爾又傳出另外幾pair婚姻現暗湧，包括馮紹峰倪妮分手、白百何陳羽凡離婚等等，今日再爆一單——憑《甄嬛傳》走紅兩岸嘅內地女星孫儷，腹大便便六月左右準備生第二胎，於微博突然貼出一句:「再見，愛情！再見，婚姻！」令人懷疑佢同鄧超近4年婚姻出現問題。

孫儷為老公鄧超生咗個囝囝，早排喺微博貼咗一張家庭照，當時宣佈已經懷有第二胎，仲留言話：「期待我們全新的家庭模式：1＋1＝4，快樂……健康……感恩……。」點知上咗星期六，孫儷喺微博突然貼出「再見，婚姻！」此語，不過佢好快刪除呢條微博，但仍被比佢更快手嘅網民截圖。不過亦有網民指鄧超最近執導嘅處男作品《分手大師》即將上映，可能係炒作做宣傳。

不過，鄧超嘅經理人就澄清話，孫儷根本冇發微博，新浪微博亦已經作出處理，話呢件事根本就係惡搞。亦有網民話:「明顯就是PS，圖片毫無可信度。」

至於章子怡，今日就於微博寫道：「感情的事，冷暖自知，誰都沒資格替別人廢話！」似是暗撐文章。