蘋果財經即時新聞係高明每日必睇嘅新聞來源，因為齊同埋快，值得所有炒股人士長期駐守瀏覽新聞。最新即時新聞有一論調：買爆輪會推郁正股，正股升輪價再升，無限輪迴。高明唔相信世上有此發達方程式。

回到7月底，該月係全年升得最勁嘅一個月，亦令絕大多數投資者認同今年係牛市。當時升勢甚勁，高明身處嘅辦公室己濔漫狂牛氣氛，沖氛頭腦之下為證明睇法正確，已經乜都講得出口：「正股噯嚟短炒，窩輪先要長期揸」、「點解日日都大賺？」、「我哋買咁多輪咪推郁隻正股？」當時全辦公室人都睇建行（939）至少上7蚊，恒指重上2015年高位，買咗唔少牛證同窩輪，坊間亦有唔少相關衍生工具達100%街貨。

結果？金管局增發外滙票據配合北韓試射導彈，大市3日跌991點，百份比計跌好少，但衍生工具已可全軍覆沒。大跌一開始，高明持有嘅一隻建行牛已犧牲，心諗：大升市無理由咁跌法。即刻全數衍生工止蝕，先得以保命。

事後，高明將上面三句金句寫低，貼喺電腦前面，視為「三大妖言惑眾」，往後再有人咁講就要小心大市短期見頂。果然，到上周二有專題報導講大陸人買爆輪推高正股，周三大市即跌300點，正股計不痛不癢，衍生工具已被玩謝。

股價短線波幅靠憧憬及資金，長線都係睇業績。買爆輪推郁正股論係推斷資金湧入導正股上升，以騰訊（700）為例，截至上周五被買爆90%以上街貨的牛證共12隻、相當於594.3萬股騰訊正股，買爆九成以上的窩輪共兩隻、相當於228.3萬股騰訊正股。即使上述成交全數即日產生，輪商亦全數買入822.6萬股騰訊對沖，過去5日騰訊平均成交2574萬股，最多亦只佔單日32%，到翌日便對股價再無影響力。

反問一句，如果理論成立，有人自窩輪被發明後狂買至今，正股股價咪可以不按估值無限上升，然後衍生工具繼續倍數上升，直到永遠？如果有呢條發達方程式，點解未見十大富豪有人靠衍生工具致富？

衍生工具買爆會推郁正股，並唔正確，因為好多人用血同肉去證明冇呢條發達方程式。

高明
https://www.facebook.com/bigricetea/