十二年前，孫柏文啱啱開始寫本欄時，曾經寫過一篇題為「鑽石可以保值？哈、哈、哈！」嘅文。當時，我用珍珠嘅歷史，去做比喻。話因科技嘅進步，鑽石係唔會有保值嘅能力。

珍珠係碳酸鈣化合物，當年日本拉麵商人御木本幸吉（Mikimoto）發明人造養珠後，珍珠價格每況愈下。天然珠、人造珠，總體價格都大跌。成為人人都唔使點諗都買得起嘅普通飾物。

鑽石，根本上係碳。只係因同其他碳化物唔同，化學組織上令光折射率極高，所以先咁閃。而天然鑽石，係要地殼長間經巨大壓力同高溫去產生，所以咁罕有。

不過，雖人類早喺五十年前，已發明人造鑽，因科技問題，製造成本極高。不過近年，造鑽成本不斷下滑，質素不斷提升，工業用鑽基本上已完全唔用天然鑽。

而數週前，唔少傳媒亦有報導鑽石業龍頭De Beers更180度飄移，今天的我、摧毀作日的我話會開始賣人造鑽。話原本賣幾萬蚊嘅一卡鑽，幾千就有交易。

經過數週明查暗訪，我發覺問題嚴重。大家都中咗鑽石毒，知「鑽石恆久遠」，即世上掘過出來嘅鑽石，冇消失過。由鑽石企業自己多年扣起，人為縮供應嘅鑽石，到各位保險箱裡嘅珍藏，一旦見人造鑽巨浪殺到，人踩人咁放時。鑽價可以點？

不過就係咁，今日送鑽石溝女會仲令港女有feel。點解？明知價格會好快跌到一仆一碌，都肯為博紅顏片刻一笑去買。呢一笑，對送鑽嘅人，你話幾值錢！

孫柏文