睇見張華峰咁嘅身形，唔使講都知道佢真識食，但唔講唔知，佢同娛樂飲食大亨林建岳係friend底，岳少新開嘅食肆，張華峰都有些少股份，方便佢自己同請客食好嘢。
岳少近年開咗幾間知名食肆，上環間Wagyu Kaiseki Den，東亞（023）主席李國寶早排先幫襯過，意大利餐廳8 1/2 Otto E Mezzo Bombana長期爆滿亦係人都知，中菜館有幾間，包括港島廳、九龍廳同潮廳。
張華峰同岳少講飲講食變成朋友，於是投資咗些少落潮廳，唔只咁，岳少打算喺灣仔活道萃峯樓下開間高級日本餐廳，家裝修緊，嚟緊又會喺上海同北京開兩間高級食肆，張華峰都會投資做小股東。
照咁睇，打算再減30磅嘅張華峰真係要好有定力先得，不停食好嘢，隨時會翻脹！