當年今日
關於我們

【被沈集成照肺慌失失】潘明輝大熱死火馬 立即換番潘頓

蘋果日報 2018/05/06 09:08

力奇先鋒潘頓潘明輝沈集成

今季潘頓同莫雷拉嘅頭馬數目,較上季接近,潘頓目前只落後8場,仲有得追,大前題係避免停賽。
今日(6日)沙田第10場三班1200米草地賽,沈集成馬房嘅「力奇先鋒」上場初跑谷草1200米,就係因潘頓停賽改配見習騎師潘明輝,以為有5磅減有幫助,點知3.1倍大熱只得第9,令捧場客大失所望。
「力奇先鋒」熱倒可能人馬唔夾,另一原因可能當晚之前一場,潘明輝騎同屬沈集成嘅「威信」三甲不入,騎者跑完解鞍時立即被沈集成「照肺」,質疑佢嘅步速智慧。
當時氣氛都幾凝重,潘明輝遭責罵自然唔好受,隨即騎「力奇先鋒」黑上加黑,一出閘同「光芒再現」互相碰撞,一度失去平衡,呢匹前置馬失去先機,敗象早呈。
今場「力奇先鋒」返回兩戰一亞一季之田草1200米,亦回配騎慣騎熟嘅潘頓,潘頓話「力奇先鋒」賽前試閘一切正常,上次隻馬出閘太論盡,希望今次際遇良好,喺3檔起步有望搶到好位。
潘頓亦話隻馬有速度,如果冇馬放,「力奇先鋒」甚至可能會改跑法,嘗試放頭爭勝。