759阿信屋噚日第二日盤點清貨，喺全線七折嘅優惠下，當然大排長龍。荃灣千色匯分店嘅人龍，仲長到包圍成間店，有成過百人喺度等畀錢，有顧客笑笑口話：「入嚟應該要排隊先。」
市民主要係搶購零食、凍肉同飲料，連柔順劑都唔放過，部份貨架已經清空㖭。
專攻零食嘅荃灣街坊王小姐，只用200幾蚊就買咗31件貨，另一名市民何小姐，就排咗半個鐘連收銀處都未見到，佢話啲嘢實在太平喇，除咗掃零食，仲推介柔順劑抵買，「平成十幾蚊㗎」。
不過，預計要關閉部份分店嘅759 Kawaiiland，雖然有分店喺同一商場，但就冇排隊人龍。